زین الدین احمد، -اردو نیوز، کوئٹہ
’ہم نے بیٹی کو پھولوں کی طرح پالا لیکن اس کے ظالم شوہر نے اسے اس وقت گولی مار کر قتل کر دیا جب وہ نماز پڑھ رہی تھی۔‘
یہ الفاظ کوئٹہ کی رہائشی نسیم بی بی کے ہیں جن کی 20 سالہ بیٹی آمنہ کو ان کے شوہر نے مبینہ طور پر فائرنگ کر کے قتل کر دیا ہے۔
آمنہ سردار بہادر خان وومن یونیورسٹی کی طالبہ تھی۔ یونیورسٹی کی طالبات نے پیر کو واقعے کے خلاف احتجاج کرنے کا اعلان کیا تھا تاہم یونیورسٹی کی انتظامیہ نے یونیورسٹی کی حدود میں احتجاج کی اجازت نہیں دی۔
مزید پڑھیں
پولیس کے مطابق آمنہ 2 اکتوبر کو شوہر کے ماموں کے گھر سے مردہ حالت میں ملی تھی۔ انہیں سر پر دائیں جانب ایک گولی لگی تھی۔
ایس ایچ او جاوید بزدار نے اردو نیوز کو بتایا کہ آمنہ کے والد منظور احمد سرپرہ نے داماد شہاب کھوسہ کے خلاف پولیس تھانہ امیر محمد دستی میں قتل کا مقدمہ درج کرایا ہے۔
ایف آئی آر کے متن کے مطابق ’آمنہ کو اس کا شوہر شہاب کھوسہ کوئٹہ کے علاقے شاہ زمان سٹریٹ پر اپنے ماموں کے گھر لے کر گیا اور پھر نائن ایم ایم پستول سے فائر کر کے قتل کر دیا۔‘
ایس ایچ او جاوید بزدار نے اردو نیوز کو بتایا کہ واقعے کے بعد ملزم فرار ہو گیا اور اب تک روپوش ہے۔ پولیس نے ملزم کی گاڑی قبضے میں لے لی ہے اور اس کی گرفتاری کے لیے کوششیں کر رہی ہیں۔
انہوں نے بتایا کہ ملزم کے والدین اور اہل خانہ بھی گھر چھوڑ کر رپوش ہو گئے ہیں اس لیے تفتیش میں مزید پیشرفت نہیں ہو سکی ہے۔
آمنہ کی بڑی بہن سحرش نے اردو نیوز کو بتایا کہ شادی سے پہلے ہم ملزم اور ان کے اہل خانہ کو نہیں جانتے تھے۔
’شہاب آمنہ کی کلاس فیلو اور سہیلی کا خالہ زاد تھا۔ سہیلی ہی ان کا رشتہ لے کر ہمارے گھر آئی تھی۔ ہم نے تب ان کے بارے میں پوچھ گچھ کی۔ لوگوں نے کوئی ایسی قابل اعتراض بات نہیں بتائی اس لیے ہم نے گزشتہ سال اگست میں شادی کرا دی۔‘
ان کا کہنا تھا کہ یہ تو کسی کو معلوم نہیں ہوتا کہ انسان اندر سے کیسا ہے۔ ہمیں کیا پتہ تھا کہ اس کا شوہر اتنا ظالم ہے ورنہ ہم کبھی یہ رشتہ قبول نہیں کرتے۔
کیا آمنہ کو پڑھائی کی اجازت نہ ملنے پر ہونے والے جھگڑے کے بعد قتل کیا گیا؟
اس سوال پر بڑی بہن سحرش نے اردو نیوز کو بتایا کہ ہم نے آمنہ کو شادی کے بعد پڑھائی جاری رکھنے کے شرط پر ہی رشتہ دیا لیکن بعد میں وہ مکر گئے۔ شوہر نے شادی کے بعد آمنہ کو یونیورسٹی جانے نہیں دیا اور شادی کے تیسرے دن ہی اس کا رویہ تبدیل ہو گیا۔
سحرش کے مطابق آمنہ پڑھنا چاہتی تھی وہ ڈاکٹر بننا چاہتی تھی مگر جب میڈیکل میں داخلہ نہیں لیا تو کوئٹہ کے سردار بہادر خان وومن یونیورسٹی میں بی ایس آنرز ایجوکیشن میں داخلہ لیا اور وہ تیسرے سمسٹر کی طالبہ تھی جب ان کی شادی ہوئی۔
ان کا کہنا تھا کہ اجازت نہ ملنے پر آمنہ نے پڑھائی چھوڑ دی تھی لیکن اس کے باوجود شوہر اسے مارتا پیٹا تھا۔
’ایک دن اس نے مجھے بتایا کہ شوہر کا رویہ اچھا نہیں اور وہ کمرے میں ٹی وی کی آواز اونچی کر کے بری طرح سے مار تا پیٹتا ہے۔ یہ بات میں نے والد کو بتائی تو وہ ان کے گھر گئے۔‘
آمنہ کے والد منظور احمد نے بتایا کہ جب ہمیں پتہ چلا کہ داماد میری بیٹی کو تشدد کا نشانہ بناتا ہے تو ہم اسے لینے گئے لیکن اس کے شوہر نے بیٹی پر پستول تانی اور میکے جانے سے منع کر دیا۔ آمنہ کو بہت بری طرح مارا پیٹا گیا تھا اس کے ایک کان کا پردہ بھی پھٹ گیا تھا۔
ان کا کہنا تھا کہ ’پھر ہم علاقے کے معززین کو لے کر گئے اور دو ماہ قبل بیٹی کو گھر لے آئے۔ کیونکہ ہم نے انہیں بیٹی کو کسی خون کے بدلے میں نہیں بلکہ ایک پیار اور محبت کے رشتے میں دیا تھا۔ ہم اس رشتہ کو ختم کرنا چاہتے تھے۔‘
ان کا کہنا تھا کہ ’کچھ دنوں بعد داماد اور ان کے والد نے جرگے میں قرآن پر قسم کھا کر کہا کہ آئندہ آپ کی بیٹی پر کوئی تشدد نہیں ہوگا اس لیے ہم نے بیٹی کو واپس جانے دیا۔‘
منظور احمد نے بتایا کہ ’ہمیں کیا معلوم تھا کہ ملزم ہماری بیٹی کو قتل کر رہا ہے۔ ہم سو گئے تھے رات اڑھائی تین بجے پولیس والے ہمارے گھر آئی اور کہا کہ آپ کی بیٹی اور داماد نے ایکسیڈنٹ کیا ہے۔ جب ہم ہسپتال پہنچے تو بیٹی ہسپتال کے مردہ خانے میں خون میں لت پڑی تھی۔‘
ان کا کہنا تھا کہ پولیس والوں اور پولیس سرجن کا رویہ اچھا نہیں تھا۔ پوسٹ مارٹم کے بدلے ہم سے رقم مانگی گئی۔ وہ مردے پر بھی سودے بازی کرنا چاہتے تھے اس لیے میں بیٹی کی لاش کو ایمبولنس میں لے جا کر دوسرے ہسپتال لے گیا۔
منظور احمد کا کہنا تھا کہ 10 دن گزرنے کے باوجود اب تک قاتل گرفتار ہوا اور نہ ہی ان کے اہل خانہ سے پوچھ گچھ کی گئی۔
