Sorry, you need to enable JavaScript to visit this website.

لانگ مارچ 4 نومبر کو اسلام آباد میں داخل ہوگا، اسد عمر

عمران خان نے 29 اکتوبر سے لانگ مارچ کے آغاز کا اعلان کیا ہے۔ فوٹو: اے ایف پی
پاکستان تحریک انصاف کے جنرل سیکریٹری اسد عمر نے کہا ہے کہ لانگ مارچ کا قافلہ چار نومبر کو اسلام آباد میں داخل ہوگا۔
بدھ کو ایک ٹویٹ میں اسد عمر نے لانگ مارچ کا پلان شیئر کرتے ہوئے کہا کہ 29 اکتوبر کو لاہور سے روانہ ہوں گے اور سارے پاکستان سے قافلے چار نومبر کو اسلام آباد میں داخل ہوں گے۔
گزشتہ روز منگل کو لاہور میں پریس کانفرنس سے خطاب میں چیئرمین تحریک انصاف عمران خان نے اعلان کیا تھا کہ وہ لانگ مارچ کا آغاز جمعے کی صبح گیارہ بجے لاہور کے لبرٹی چوک سے کر رہے ہیں۔
عمران خان کا کہنا تھا کہ وہ جی ٹی روڈ سے عوام کے ساتھ اسلام آباد کی طرف جائیں گے۔
اسد عمر کے مطابق قافلہ لاہور سے روانہ ہو کر مریدکے، کامونکی، گوجرانوالہ، ڈسکہ، سیالکوٹ، اور دیگر علاقوں سے ہوتے ہوئے راولپنڈی سے اسلام آباد میں داخل ہوگا۔
دوسری جانب تحریک انصاف نے ضلعی انتظامیہ کو درخواست جمع کروائی ہے کہ وہ چار نومبر کو سرینگر ہائی وے پر ایچ نائن اور جی نائن کے درمیان دھرنا دیں گے۔
تحریک انصاف کے رہنما اور صوبہ خیبرپختونخوا کی اسمبلی کے ڈپٹی سپیکر محمود جان نے اردو نیوز کو بتایا تھا کہ ’لانگ لانگ مارچ کی بھرپور تیاری ہے اور صرف کارکن ساتھ لے کر جائیں گے۔ پہلے فورس استعمال کی تھی اور نہ ہی آئندہ کریں گے۔
منگل کو پریس کانفرنس سے خطاب میں عمران خان نے کا کہا تھا کہ ’لانگ مارچ کا کوئی ٹائم فریم نہیں ہے۔ اسلام آباد میں کسی سے لڑنے نہیں جا رہے۔ ہم ریڈ زون نہیں جائیں گے۔ قانون پر عمل کریں گے۔‘
انہوں نے مزید کہا ’ہماری حکومت میں تین مرتبہ لانگ مارچ ہوئے۔ ہم نے کبھی بھی کسی کو لانگ مارچ کرنے سے نہیں روکا۔ فضل الرحمان نے دو اور بلاول بھٹو نے ایک بار لانگ مارچ کیا۔ مریم نواز نے بھی لانگ مارچ کیا تھا لیکن وہ گوجرانوالہ میں کہیں رہ گئی تھیں۔‘

شیئر: