اسرائیلی انتخابات میں سابق وزیراعظم نیتن یاہو واپسی کے امیدوار

اسرائیل کے سابق وزیراعظم بنیامین نیتن یاہو حالیہ انتخابات کے ذریعے اقتدار میں واپسی کے امیدوار ہیں اور ان کا مقابلہ انتہائی دائیں بازو کی جماعت سے ہے جس کے رہنما اسرائیل سے ہمدردی نہ رکھنے والوں کو ملک بدر کرنے کا مطالبہ کر رہے ہیں۔

برطانوی خبر ایجنسی روئٹرز کے مطابق اسرائیل کو گذشتہ چار سال سے بھی کم عرصے میں اپنے پانچویں انتخابات سے گزرنا پڑ رہا ہے اور اس بار ووٹرز کا رحجان ٹرن آؤٹ کو نقصان پہنچا سکتا ہے۔

واضع رہے کہ اسرائیل کے سب سے طویل عرصے تک وزیراعظم رہنے والے نیتن یاہو پر بدعنوانی کے الزامات کے تحت مقدمہ چل رہا ہے۔

نیتن یاہو ان الزامات کی تردید کرتے ہیں لیکن ان کی دائیں بازو کی لیکوڈ پارٹی اب بھی پارلیمنٹ میں سب سے بڑی جماعت کے طور پر ابھرنے کی امید رکھتی ہے۔

گزشتہ ہفتے شائع ہونے والے حتمی رائے عامہ کے جائزوں سے ظاہرہوتا ہے کہ 120 نشستوں والی پارلیمنٹ میں اکثریت کے لیے درکار61 نشستوں سے وہ ابھی تک کم ہیں۔

دریں اثنا اسرائیل کے سبکدوش ہونے والے وزیراعظم یائر لاپڈ کے اتحادیوں سے انحراف کے بعد قبل ازوقت انتخابات کرانے کے فیصلے سے شروع ہونے والی مہم میں سکیورٹی کے مسائل اور مہنگائی ووٹروں کے خدشات میں سرفہرست ہیں۔

حالیہ انتخابات کے سلسلے میں چلائی جانے والی مہم مقبوضہ مغربی کنارے میں مہینوں سے جاری تشدد کے پس منظر بھی سامنے آ رہی ہے۔

واضح رہے کہ نیتن یاہو کو قانونی مسائل کا سامنا ہے ان پر 2019 میں رشوت ستانی، دھوکہ دہی کے الزامات عائد کیے گئے تھے۔