’میرا دل یہ پُکارے آجا‘ والی عائشہ ندا یاسر کے شو میں پہنچ گئیں

سوشل میڈیا پر حالیہ دنوں ’میرا دل یہ پکارے آجا‘ گانے پر ڈانس کرنے کی وجہ سے مقبولیت حاصل کرنے والی خاتون عائشہ بالآخر ندا یاسر کے مارننگ شو میں پہنچ گئیں۔

نجی ٹی وی اے آر وائی ڈیجیٹل کے مشہور شو گڈ مارننگ پاکستان میں ندا یاسر کے ہمراہ عائشہ کو بھی دیکھا جاسکتا ہے۔

ندا یاسر کے مارننگ شو کے بارے میں ایک تاثر یہ دیا جاتا ہے کہ جو بھی سوشل میڈیا پر وائرل ہوتا ہے اسے ندا یاسر فوراً اپنے شو پر بلا لیتی ہیں۔

عائشہ لاہور سے تعلق رکھنے والی ٹک ٹاکر اور انسٹاگرام سٹار ہیں۔

رواں ماہ فوٹو اینڈ ویڈیو شیئرنگ پلیٹ فارم انسٹاگرام پر عائشہ کی شادی کی تقریب میں ڈانس کی ویڈیو وائرل ہوئی تھی جس میں وہ لتا منگیشکر کے گانے میرا دل یہ پکارے آجا کے ریمکس پر ڈانس کر رہی ہیں۔

ندا یاسر کے شو میں بھی عائشہ نے پنجابی گانے ’بتیاں بجھائی رکھدی‘ پر ڈانس کیا۔
عائشہ ٹک ٹاک اور انسٹاگرام پر فیشن، میوزک اور ڈانس کی تصاویر اور ویڈیوز اپلوڈ کرتی ہیں۔

عائشہ کی اس وائرل ویڈیو کو پاکستان سمیت انڈیا میں بھی بڑی تعداد میں دیکھا جارہا ہے۔
ندا یاسر کے مارننگ شو میں عائشہ کو دیکھ کر سماجی رابطوں کی ویب سائٹ ٹوئٹر پر سوشل میڈیا صارفین بھی تبصرے کر رہے ہیں۔
صائمہ کہتی ہیں کہ ’یقین نہیں آرہا کہ ندا یاسر نے اپنے شو میں میرا دل یہ پکارے آجا گانے پر وائرل ہونے والی لڑکی کو بلا لیا ہے، مطلب کوئی اور نہیں ملا تھا؟‘

عائشہ نامی ایک صارف لکھتی ہیں کہ ’ندا یاسر کبھی مایوس نہیں کرتیں۔‘

رِدا علی نے پی ایس ایل فرنچائز پشاور زلمی کے مالک جاوید آفریدی کو ٹیگ کرتے ہوئے لکھا کہ ’دیکھ لیں، آج کل سب سے وائرل یہی چل رہی ہیں، آپ اسے برینڈ ایمبیسیڈر بنا سکتے ہیں۔‘