Sorry, you need to enable JavaScript to visit this website.

بیرون مملکت سے حج کمپنیوں کے لیے لائسنس، شرائط کیا ہیں؟

لائسنس کا دورانیہ پانچ برس کا ہوگا اور اس میں توسیع ہو سکے گی (فائل فوٹو: روئٹرز)
سعودی وزارت حج نے بیرون مملکت سے حج کمپنیوں کے لیے لائسنس کے اجرا کے لیے مقرر شرائط جاری کی ہیں۔
عکاظ اخبار کے مطابق وزارت حج وعمرہ نے ایک بیان میں کہا کہ ’آئندہ حج سیزن کے دوران طوافہ کمپنیوں کے تحت کام کرنے والی کپمنیوں کے لیے لائسنس جاری کیے جائیں گے۔‘
نئی کمپنیاں گزشتہ کئی عشروں سے حجاج کو سہولتیں فراہم کرنے والی فیلڈ سروس ایجنیسوں کی جگہ لیں گی۔
وزارت حج کا کہنا ہے کہ ’لائسنس کا دورانیہ پانچ برس کا ہوگا اور اس میں توسیع ہو سکے گی۔ لائسنس کے اجرا کی درخواست کی آخری تاریخ رواں سال 24 دسمبر ہے۔‘
وزارت کے مطابق ’لائسنس کے لیے درخواست دینے والی کمپنی کا مالک اور منتظم سعودی ہوں گے۔ ایک لاکھ حجاج کو سروس فراہم کرنے والی کمپنی کا کم از کم سرمایہ پچاس لاکھ ریال ہونا چاہیے۔‘
’ ایک شرط یہ بھی عائد کی  گئی ہے کہ لائسنس کی درخواست ایسا کوئی شخص نہیں دے سکتا جس کے خلاف وزارت خدمات میں کوتاہی کا فیصلہ سنا چکی ہو۔‘

اسی طرح فیس اور زر ضمانت کی شرائط کی پابندی بھی لازمی ہو گی۔

وزارت کا کہنا ہے کہ ’لائسنس حاصل کرنے والی کمپنی کو مقررہ ضوابط کے مطابق سہولتیں فراہم کرنا ہوں گی۔ ان میں قیام و طعام کی سہولتیں شامل ہوں گی۔
 ’زر ضمانت کے طور پر کمپنی کے سرمائے کا کم از کم 10 فیصد جمع کرانا ہوگا۔‘
علاوہ ازیں سہولتوں کے لیے ٹھیکوں کا بھی 10 فیصد بھی کسی مقامی بینک میں جمع کرانا ہوگا۔ اس کا دورانیہ ایک سال کا ہو گا۔

شیئر: