پیٹرولیم مصنوعات کی قیمتوں میں بڑا اضافہ، پیٹرول 22 روپےلیٹر مہنگا
وفاقی حکومت نے گیس کی قیمتوں میں 16.6 فیصد سے 112 فیصد تک اضافہ کر دیا ہے (فوٹو: ٹوئٹر)
حکومت نے پیٹرولیم مصنوعات کی قیمتوں میں بڑے اضافے کا اعلان کر دیا ہے۔
وزارت خزانہ کی جانب سے جاری پریس ریلیز میں کہا گیا ہے کہ حکومت پاکستان نے پٹرولیم مصنوعات کی موجودہ قیمتوں میں ردوبدل کا فیصلہ کیا ہے۔
اعلامیے کے مطابق نئی قیمتوں کا اطلاق 16 فروری سے ہوگا۔
اعلامیے میں کہا گیا ہے کہ پیٹرل کی قیمت میں 22 روپے 20 پیسے فی لیٹر اضافہ کر دیا گیا۔
اضافے کے بعد پیٹرول کی نئی قیمت 272 روپے فی لیٹر ہوگئی ہے۔ ہائی سپیڈ ڈیزل کی قیمت میں 17 روپے 20 پیسے کا اضافہ کیا گیا ہے۔ اضافے کے بعد ہائی سپیڈ ڈیزل کی نئی قیمت 280 روہے ہوگئی ہے۔
لائٹ ڈیزل کی قیمت میں نو روپے 68 پیسے فی لیٹر اضافہ کیا گیا ہے جس کے بعد لائٹ ڈیزل کی نئی قیمت 196 روپے 68 پیسے فی لیٹر ہوگئی ہے۔
مٹی کے تیل کی قیمت میں 12 روپے 90 پیسے کا اضافہ کیا گیا ہے۔ اضافے کے بعد مٹی کے تیل کی نئی قیمت 202 روپے 73 پیسے ہوگئی ہے۔
خیال رہے حکومت پاکستان کے آئی ایم ایف کے ساتھ فنڈ کے معطل شدہ پروگرام کی بحالی کے لیے مذاکرات جاری ہے۔
آئی ایم ایف نے نویں جائزہ اجلاس کے دوران آئی ایم ایف پروگرام کے قسط کی فراہمی کے لیے مختلف اقدامات کا مطالبہ کیا تھا جن میں تیل اور گیس کی قیمتوں میں اضافے کے ساتھ ساتھ ریونیو اکھٹا کرنے کے لیے مختلف ٹیکس اقدامات شامل ہیں۔
وزیر خزانہ اسحاق ڈار نے فنانس سپلیمنٹری بل 2023 قومی اسمبلی اور سینیٹ میں پیش کر دیا تھا جس کے تحت 170 ارب ریونیو جمع کرنے کے لیے اقدامات تجویز کی گئی ہے۔ بل کے تحت مختلف اشیاء پر جی ایس ٹی کی شرح 17 سے بڑھا کر 18 فیصد کر دی گئی ہے۔
اس سے قبل وفاقی حکومت نے منی بجٹ سے پہلے جنرل سیلز ٹیکس میں اضافے کا نوٹیفیکیشن جاری کیا تھا۔ وزارت خزانہ کی جانب سے جاری کیے گئے نوٹیفیکیشن کے مطابق جنرل سیلز ٹیکس 17 فیصد سے بڑھا کر 18 فیصد مقرر کیا گیا تھا۔
فیڈرل بورڈ آف ریونیو نے اس سے قبل سگریٹس پر ٹیکس کی شرح میں اضافہ کا اعلان کیا تھا، تاہم بعد ازاں تمام اشیا پر جی ایس ٹی کی شرح 17 سے بڑھا کر 18 فیصد مقرر کر دی گئی ہے۔
نوٹیفیکیشن کے مطابق پیکنگ والی تمام اشیا پر سیلز ٹیکس میں اضافہ کیا گیا جو کہ فوری طور پر لاگو ہو گا۔
گیس کی قیمتوں میں اضافے کا نوٹفکیشن جاری
آئی ایم ایف ہی کے مطالبے پر وفاقی حکومت نے گیس کی قیمتوں میں 16.6 فیصد سے 112 فیصد تک اضافہ کر دیا تھا۔
حکومتی منظوری کے بعد آئل اینڈ گیس ریگولیٹری اتھارٹی نے بدھ کی رات کو گیس کی قیمتوں میں اضافے کا نوٹفکیشن جاری کر دیا ہے۔
نوٹفکیشن کے مطابق اضافے سے 50 کیوبک میٹر تک گیس استعمال کرنے والے گھریلو صارفین مستثنیٰ ہوں گے۔
