’سچی؟ میں نہیں مانتا،‘ کراچی کنگز نے ملتان سلطانز کو شکست دے دی

پاکستان سپر لیگ (پی ایس ایل) کے 14 ویں میچ میں کراچی کنگز نے ملتان سلطانز کو 66 رنز سے ہرا کر اپنی مسلسل شکستوں کے سلسلے کو بریک لگا دیا ہے۔

اتوار کو کراچی کے نیشنل بینک کرکٹ ارینا میں کھیلے گئے میچ میں کراچی کنگز نے پہلے بیٹنگ کرتے ہوئے مقررہ 20 اوور میں 167 رنز بنائے تھے جس کے جواب میں ملتان سلطانز کی ٹیم 17 ویں اوور میں 101 رنز پر آل آؤٹ ہوگئی۔

کراچی کنگز کی ٹیم پی ایس ایل 2023 میں اب تک چھ میچ کھیل چکی ہے جس میں صرف وہ دو میچز میں کامیابی حاصل کر سکے ہیں۔

ملتان سلطانز چھ میں سے چار میچ چیت کر آٹھ پوائنٹس کے ساتھ پوائنٹس ٹیبل پر پہلے نمبر پر موجود ہے۔

کراچی کنگز کی جانب سے جنوبی افریقہ کے تبریز شمسی اور پاکستانی بیٹر طیب طاہر نے پی ایس ایل 2023 کا پہلا میچ کھیلا اور دونوں کی پرفارمنس شاندار رہی۔

طیب طاہر نے 46 گیندوں پر آٹھ چوکوں اور ایک چھکے کی مدد سے 65 رنز بنائے جبکہ لیگ سپنر تبریز شمسی نے چار اوورز میں صرف 18 رنز دے کر ملتان سلطانز کے تین کھلاڑیوں کو پویلین کی راہ دکھائی۔

کراچی کنگز کے حامیوں نے تبریز شمسی اور طیب طاہر کو پہلے پانچ میچز نہ کھلانے پر ٹیم انتظامیہ کو آڑے ہاتھوں لیا۔

نواز نے ایک ٹویٹ میں لکھا ’یہ سارا وقت طیب طاہر اور تبریز شمسی بینچ پر بیٹھے تھے اور کراچی کنگز حیدر علی اور عمران طاہر کو کھلاتے رہے۔‘

پی ایس ایل کا ساتواں ایڈیشن بھی کراچی کنگز کے لیے اچھا نہیں رہا تھا اور یہ ٹیم 10 میں سے صرف ایک میچ جیت سکی تھی۔

فرید خان نے اس حوالے سے لکھا کہ ’کراچی کنگز اس سیزن میں پچھلے پورے سیزن کے مقابلے میں زیادہ میچز جیت چکی ہے۔ کم از کم ابھی انہوں نے چار مزید میچز کھیلنے ہیں۔‘

کراچی کنگز کی جیت پر صارفین میمز بھی شیئر کر رہے ہیں۔ مشری نے ایک ٹویٹ میں لکھا ’کراچی کنگز آج کا میچ جیت گئے ہیں۔‘ اسی ٹویٹ کے نیچے شیئر کی گئی میم میں لکھا تھا کہ ’نہیں۔۔ سچی؟ میں نہیں مانتا۔‘

نور السحر صدیقی نے کراچی کی جیت پر میم شیئر کی جس پر لکھا تھا کہ ’بہت مزہ آریا ہے۔ دل گارڈن گارڈن ہو رہا ہے۔‘

تبریز شمسی کو 18 رنز دے کر تین وکٹیں لینے پر ’مین آف دا میچ’ قرار دیا گیا۔