میں اچھا امپائر بن سکتا ہوں: فاسٹ بولر حسن علی

پاکستان سپر لیگ (پی ایس ایل) میں اسلام آباد یونائیٹڈ کے لیے کھیلنے والے فاسٹ بولر حسن علی کا کہنا ہے کہ انہیں کرکٹ میچ کے بعد کرکٹ سے متعلق گفتگو کرنا پسند نہیں۔

پی ایس ایل کے ٹوئٹر اکاؤنٹ سے شیئر کیے جانے والے ایک انٹرویو میں حسن علی سے پوچھا گیا کہ کیا کرکٹ بولر کا گیم ہے؟ اس سوال کا جواب دیتے ہوئے ان کا کہنا تھا کہ ’اگر تین چھکے پڑنے کے بعد بولر کو چوتھی گیند پر وکٹ مل جاتی ہے تو یہ بولر کی جیت ہے۔‘

حسن علی جو وکٹ لینے کے بعد جشن منانے کے اپنے منفرد انداز کے حوالے سے مشہور ہیں وہ کہتے ہیں کہ ’ان کا جشن منانے کا انداز 110 فیصد سب سے زیادہ بہترین ہے۔‘

جب ان سے پوچھا گیا کہ کیا وہ سجھتے ہیں کہ وہ ایک اچھے امپائر بن سکتے ہیں تو ان کا کہنا تھا کہ ’میں اچھا امپائر بن سکتا ہوں۔‘

فاسٹ بولر کا کہنا تھا کہ اگر ان کا کوئی دوست انہیں کھانے پر بلائے اور کرکٹ کی بات کرے تو یہ انہیں زیادہ نہیں بھائے گا۔ ان کا کہنا تھا کہ ’مجھے کرکٹ کے بعد کرکٹ کی باتیں کرنا پسند نہیں۔‘

حسن علی پاکستان کرکٹ ٹیم کی جانب سے تینوں فارمیٹس کی کرکٹ کھیل چکے ہیں۔ انہوں نے 22 ٹیسٹ میچوں میں پاکستان کی طرف سے 78 وکٹیں حاصل کی ہیں۔

حسن علی 60 ون ڈے میچوں میں پاکستان کی نمائندگی کرتے ہوئے 91 جبکہ 50 ٹی20 میچوں میں 60 وکٹیں حاصل کر چکے ہیں۔

حسن علی رواں سال پی ایس ایل میں اسلام آباد یونائیٹڈ کی جانب سے اب تک تین میچ کھیل چکے ہیں جن میں انہوں نے سات وکٹیں حاصل کی ہیں۔