Sorry, you need to enable JavaScript to visit this website.

افغانستان سے سیریز، عبدالرحمان پاکستان کے ہیڈ کوچ مقرر

عبدالرحمان نے کہا کہ ’یہ میرے لیے کتنے اعزاز کی بات ہے یہ میں الفاظ میں نہیں بتا سکتا۔‘ (فوٹو: عبدالرحمان ٹوئٹر)
پاکستان اور افغانستان کے درمیان رواں ماہ شارجہ میں شیڈول ٹی20 سیریز کے لیے سپورٹ سٹاف کا اعلان کر دیا گیا ہے۔
پاکستان کرکٹ بورڈ (پی سی بی) کے چیئرمین مینیجمنٹ کمیٹی نجم سیٹھی نے سماجی رابطوں کی ویب سائٹ ٹوئٹر پر اپنی ٹویٹ میں اعلان کیا کہ ’اس سیریز کے لیے عبدالرحمان پاکستان ٹیم کے ہیڈ کوچ ہوں گے۔‘
نجم سیٹھی کے مطابق عبد الرحمان  کے ہیڈ کوچ ہونے کے ساتھ ساتھ سابق فاسٹ بولر عمر گُل بولنگ کوچ، سابق بیٹر محمد یوسف بیٹنگ کوچ جبکہ عبدالمجید ٹیم کے فیلڈنگ کوچ ہوں گے۔
افغانستان کے خلاف ٹی20 سیریز کے لیے منصور رانا ٹیم کے مینیجر کی ذمہ داریاں نبھائیں گے۔
پاکستان اور افغانستان کے درمیان ٹی20 سیریز کے میچز 24، 26 اور 27 مارچ کو شیڈول ہیں۔
 نئے کوچ عبدالرحمان اب تک کن ٹیموں کی کوچنگ کر چکے ہیں؟
پی سی بی کی پریس ریلیز کے مطابق ’عبدالرحمان باصلاحیت کوچ ہیں جو کہ ڈومیسٹک کرکٹ میں اپنی ذمہ داریاں نبھا رہے ہیں۔ جب خیبر پختوانخوا نے ڈومیسٹک ٹورنامنٹ نیشنل ٹی20 اور پاکستان کپ جیتا تو اس ٹیم کے کوچ عبدالرحمان تھے۔‘
’عبدالرحمان کی کوچنگ میں پشاور پینتھرز نے دو مرتبہ نیشنل ٹی20 ٹورنامنٹ جیتا جبکہ وہ 2017 میں پاکستان سپر لیگ (پی ایس ایل) جیتنے والی پشاور زلمی کے اسسٹنٹ کوچ بھی تھے۔‘
’عبدالرحمان گزشتہ چار سالوں سے زمبابوے کے سابق کھلاڑی اور معروف کوچ اینڈی فلاور کے ماتحت پی ایس ایل فرنچائز ملتان سلطانز کے اسسٹنٹ کوچ ہیں جبکہ وہ گزشتہ سال ملتان میں کھیلی گئی پاکستان اور بنگلہ دیش انڈر 19 سیریز میں بھی قومی ٹیم کے کوچ رہ چکے ہیں۔‘
اس موقع پر انہوں ںے ٹوئٹر پر خیالات کا اظہار کرتے ہوئے کہا کہ ’یہ میرے لیے کتنے اعزاز کی بات ہے یہ میں الفاظ میں نہیں بتا سکتا، میں چیئرمین اور پی سی بی انتظامیہ کا شکریہ ادا کرنا چاہتا ہوں جنہوں ںے مجھ پر بھروسہ کیا اور مجھے پاکستان کی نمائندگی کرنے کا موقع دیا۔ اب وقت آگیا ہے کہ میں اپنے تجربے سے فائدہ اٹھاؤں اور دی گئی ذمہ داری کے ساتھ انصاف کر سکوں۔‘
عبدالرحمان کو پاکستان ٹیم کا نگران کوچ بنائے جانے کے فیصلے کا ٹوئٹر صارفین بھی خیر مقدم کر رہے ہیں۔
احمد خواجہ نے نیک خواہشات کا اظہار کرتے ہوئے کہا کہ ’امید کرتا ہوں ٹٰیم اچھا کھیلے گی اور انہیں لمبے عرصے کے لیے کوچنگ کا موقع دیا جائے۔ پاکستان ٹیم کا ہیڈ کوچ ہونا ہمارے تمام ہائی پروفائل لوکل کوچز کا ہدف ہونا چاہیے۔‘
صحافی آصف خان نے اپنی ٹویٹ میں لکھا کہ ’عبدالرحمان کو کوچ بنانا ایک بہترین فیصلہ ہے جس سے گراس روٹ سطح کے کوچ کو موقع ملا ہے۔ اس بندے نے انڈر 16، انڈر 19 سمیت فرسٹ کلاس اور فرنچائز کرکٹ میں کام کیا ہے۔ رحمان کوالیفائڈ کوچ ہیں، انہوں نے ٹیسٹ کرکٹ تو نہیں کھیلی ہوئی لیکن کافی تجربہ کار ہیں۔‘
حسیب نے خوشی کا اظہار کرتے ہوئے کہا کہ ’واہ، عبدالرحمان بطور ہیڈ کوچ، مجھے یقین نہیں آ رہا۔ یہ تو جیت ہے۔‘

 

شیئر: