جی سیون ممالک کی حوثیوں کے سعودی عرب پر حملوں کی مذمت، ایران سے اسلحے کی فراہمی روکنے کا مطالبہ
جی سیون ممالک کے وزرائے خارجہ نے مشترکہ اعلامیے میں کہا کہ حوثیوں کے حملوں میں عام شہریوں کو بھی نشانہ بنایا گیا ہے (فوٹو: روئٹرز)
جی سیون ممالک کے وزرائے خارجہ نے یمن کے اندر اور سعودی عرب کے خلاف حوثی باغیوں کے مسلسل حملوں کی مذمت کرتے ہوئے ایران سمیت تمام فریقوں پر زور دیا ہے کہ وہ حوثی ملیشیا کو اسلحہ فراہم کرنے اور اِس کی حمایت کرنے کا سلسلہ بند کریں۔
عرب نیوز کی ایک رپورٹ کے مطابق بدھ کو پیرس میں 9 اور 10 نومبر کو ہونے والے اجلاس کے بعد جاری کردہ مشترکہ اعلامیے میں کینیڈا، فرانس، جرمنی، اٹلی، جاپان، برطانیہ اور امریکا کے وزرائے خارجہ اور یورپی یونین کے خارجہ امور کے اعلیٰ نمائندے نے کہا کہ حوثیوں کے حملوں میں عام شہریوں اور شہری تنصیبات کو بھی نشانہ بنایا گیا ہے۔
وزرائے خارجہ نے یمن کی حکومت اور سعودی عرب کے ساتھ یکجہتی کا اظہار کرتے ہوئے بین الاقوامی قوانین کے مطابق اُن کی اپنی سلامتی، خودمختاری اور علاقائی سالمیت کے دفاع کے حق کی توثیق کی۔
اُنہوں نے حوثی باغیوں سے مطالبہ کیا کہ وہ تمام فوجی کارروائیاں اور دھمکیاں فوری طور پر بند کریں تاکہ ایک جامع سیاسی عمل کی بحالی کی راہ ہموار ہوسکے۔
جی سیون وزرائے خارجہ نے یمن کے شہر تعز میں فوری طور پر انسانی امداد کی فراہمی کے لیے راہداری کھولنے کا بھی مطالبہ کیا۔ علاوہ ازیں، اُنہوں نے حوثیوں کی تحویل میں موجود تمام امدادی کارکنوں کی رہائی کا مطالبہ دہرایا، جن میں اقوام متحدہ کے 70 اہلکار بھی شامل ہیں۔
