زین الدین احمد، -اردو نیوز، کوئٹہ
یوریشیا کار اور بائیک ریلی پیر کو 10 ممالک سے گزرتے ہوئے پاکستان پہنچ گئی ہے۔
ریلی کے شرکاء پاکستان کے شمالی علاقہ جات کی سیر کرنے کے بعد انڈیا روانہ ہوں گے۔
10 گاڑیوں اور سات ہیوی بائیکس پر سفر کرنے والے 35 سیاح اس ریلی کا حصہ ہیں جنہوں نے یکم مئی کو فرانس کے دار الحکومت پیرس اپنے سفر کا آغاز کیا تھا۔
فرانس، اٹلی، کروشیا، بوسنیا، مونٹی نیگرو، البانیہ ، مقدونیہ، بلغاریہ، ترکی اور ایران گزرتے ہوئے پیر کو ریلی کے شرکا بلوچستان کے علاقے تفتان سرحد سے پاکستان میں داخل ہوئے۔
ریلی کے شرکا کا پاکستانی شہریوں نے استقبال کیا اور امید ظاہر کی کہ ریلی کا بقیہ سفر خوشگوار اور مہم جوئی سے بھر پور ہوگا۔
ریلی کے شرکا چاغی اور نوشکی کے صحرائی اور پہاڑی علاقوں سے گزرتے ہوئے رات گئے وادی کوئٹہ پہنچ گئے۔
