ورلڈ کپ میں پاکستان اور انڈیا کا میچ کس شہر میں ہوگا؟

رواں برس انڈیا میں ہونے والے آئی سی سی کرکٹ ورلڈ کپ میں پاکستان اور انڈیا کا میچ ممکنہ طور پر 15 اکتوبر کو کھیلا جائے گا۔

کرکٹ کی کوریج کرنے والی ویب سائٹ ’کرک انفو‘ نے دعویٰ کیا ہے کہ رواں برس شیڈول ورلڈ کپ میں پاکستان اپنا پہلا میچ چھ اکتوبر کو کوالیفائی کرنے والی ٹیم کے ساتھ حیدر آباد دکن میں کھیلے گا۔

اسی طرح انڈیا میگا ایونٹ میں اپنا پہلا میچ آٹھ اکتوبر کو چنئی میں آسٹریلیا کے خلاف کھیلے گا۔

ورلڈ کپ کا آغاز پانچ اکتوبر کو انگلینڈ اور نیوزی لینڈ کے درمیان میچ سے ہو گا۔

انڈین کرکٹ بورڈ (بی سی سی آئی) نے ورلڈ کپ کے شیڈول کا ڈرافٹ آئی سی سی سے شیئر کر دیا ہے جس کے بعد اسے ایونٹ میں شریک تمام ٹیموں کے بورڈز کو بھجوایا جائے گا جب کہ حتمی شیڈول اگلے ہفتے کے آغاز میں جاری کیا جائے گا۔

ڈرافٹ شیڈول میں ورلڈ کپ کے دونوں سیمی فائنل کے وینیوز کا اعلان نہیں کیا گیا۔ ورلڈ کپ کے سیمی فائنلز ممکنہ طور پر 15 اور 16 نومبر کو کھیلے جائیں گے۔ ایونٹ کا فائنل 19 نومبر کو احمد آباد میں ہوگا۔

کرک انفو کو ملنے والی معلومات کے مطابق انڈیا اپنے ورلڈ کپ کے میچ نو مختلف شہروں میں کھیلے گا۔

اگر ڈرافٹ شیڈول میں انڈیا کے میچز کو دیکھا جائے تو میزبان ٹیم آٹھ اکتوبر کو چنئی میں آسٹریلیا کے خلاف اپنا پہلا میچ کھیلے گی۔ اس کے بعد انڈیا کا افغانستان سے نئی دہلی میں 11 اکتوبر کو مقابلہ ہو گا۔

انڈیا اپنا تیسرا میچ روایتی حریف پاکستان کے خلاف 15 اکتوبر کو احمد آباد میں کھیلے گا۔ اسی طرح انڈیا کا چوتھا میچ 19 اکتوبر کو پونے میں بنگلہ دیش کے خلاف ہو گا۔

2011 کی عالمی چیمپیئن ٹیم اپنا پانچواں میچ 22 اکتوبر کو نیوزی لینڈ کے خلاف دھرم شالہ میں کھیلے گی جبکہ اس کا چھٹا میچ 29 اکتوبر کو انگلینڈ کے خلاف لکھنؤ میں ہو گا۔

اسی طرح دو نومبر کو انڈین ٹیم کوالیفائر ٹیم کے خلاف اپنا ساتواں میچ ممبئی میں  کھیلے گی جبکہ اس کا آٹھواں میچ پانچ نومبر کو کولکتہ میں جنوبی افریقہ کے خلاف ہو گا۔

انڈٰین ٹیم ایونٹ میں اپنا آخری راؤںڈ میچ 11 نومبر کو بنگلور میں کوالیفائر کے خلاف کھیلے گی۔

دوسری جانب پاکستان ورلڈ کپ میں اپنے میچ حیدر آباد دکن، کولکتہ، چنئی، بنگلور اور احمد آباد میں کھیلے گا۔

اگر میگا ایونٹ میں پاکستان کے میچز کی بات کی جائے تو بابر اعظم کی ٹیم چھ اکتوبر کو حیدر آباد دکن میں کوالیفائر ٹیم سے اپنا پہلا میچ کھیلے گی۔ اسی طرح 12 اکتوبر کو گرین شرٹس کا مقابلہ دوسری کوالیفائر ٹیم سے حیدر آباد دکن میں ہی ہو گا۔

پاکستان 15 اکتوبر کو اپنا تیسرا میچ روایتی حریف انڈیا کے خلاف احمد آباد میں کھیلے گا جبکہ اس کا چوتھا میچ 20 اکتوبر کو آسٹریلیا کے خلاف بنگلور میں ہو گا۔

اسی طرح 23 اکتوبر کو پاکستان افغانستان کے خلاف چنئی میں اپنا پانچواں میچ کھیلے گا جبکہ 27 اکتوبر کو گرین ٹیم کا مقابلہ جنوبی افریقہ کے خلاف چنئی میں ہی ہو گا۔

پاکستانی ٹیم ایونٹ میں اپنا ساتواں میچ 31 اکتوبر کو بنگلہ دیش کے خلاف کولکتہ میں کھیلے گی جبکہ اس کا آٹھواں میچ بنگلور میں نیوزی لیںڈ کے خلاف پانچ نومبر کو ہو گا۔

پاکستان ورلڈ کپ میں اپنا آخری راؤںڈ میچ 12 نومبر کو انگلینڈ کے خلاف کولکتہ میں کھیلے گا۔

ورلڈ کپ کے دوسرے بڑے میچز میں آسٹریلیا اور نیوزی لینڈ کا 29 اکتوبر کو دھرم شالہ میں میچ شیڈول ہے جبکہ آسٹریلیا اور انگلینڈ کے درمیان میچ چار نومبر کو احمد آباد میں کھیلا جائے گا۔

اسی طرح نیوزی لینڈ اور جنوبی افریقہ کے درمیان میچ یکم نومبر کو پونے میں ہو گا۔

خیال رہے ورلڈ کپ کے شروع ہونے میں ابھی چار ماہ باقی ہیں تاہم اس کا حتمی شیڈول ابھی تک نامعلوم وجوہات کی بنا پر تاخیر کا شکار ہے۔

2015 اور 2019 کے ورلڈ کپ کا شیڈول ایونٹ سے ایک سال قبل جاری کر دیا گیا تھا۔