ویمنز ورلڈ کپ میں مراکش کی گول سکورر نے تاریخ رقم کر دی

مراکش کی 30 سالہ خاتون فٹبالر ابتسام جریدی نے اپنا نام فٹبال کی ریکارڈ بک میں ہمیشہ کے لیے درج کرا لیا ہے، وہ  فیفا ویمنز ورلڈ کپ میں گول کرنے والی پہلی عرب خاتون بن گئی  ہیں۔  

عرب نیوز کے مطابق ابتسام نے جنوبی کوریا کے خلاف مراکش کو 0-1 سے فتح دلا کر ورلڈ کپ میں آگے بڑھنے کی امید کو زندہ رکھا ہے۔

مراکش اپنے گروپ کا آخری میچ کولمبیا کے خلاف 3 اگست کو کھیلے گا جب کہ افتتاحی میچ میں جرمنی کے خلاف 0-6 سے شکست کا سامنا کرنا پڑا تھا۔

ایڈیلیڈ کے ہندمارش فٹبال سٹیڈیم میں 12,886 شائقین موجود تھے، یہ سٹیڈیم ویمنز ورلڈ کپ میں سب سے چھوٹا سٹیڈیم ہے۔

میچ کے چھٹے منٹ میں کورین کھلاڑی کم جونگ کو ڈاج کراتے ہوئے ابستام نے خوبصورت پاس کو ہیڈ کے ذریعے گول میں بدل دیا اور ٹیم کو برتری دلا کر میچ کے آخر تک برقرار رکھنے میں کامیابی حاصل کر لی۔

میچ کے اختتام پر ابتسام نے کہا ہے کہ اس کامیابی پر ہم سب بہت خوش ہیں، یہ فتح مراکش اور عربوں کی فتح ہے اور ہمیں محنت کا پھل کامیابی کی صورت میں ملا ہے۔

واضح رہے کہ مراکش کی نوہیلا بینزینا ویمنز ورلڈ کپ میں حجاب کے ساتھ کھیلنے والی پہلی خاتون کھلاڑی بن گئی ہیں جب انہوں نے مراکش کے دوسرے میچ میں جنوبی کوریا کے خلاف ٹیم میں جگہ حاصل کی۔