شمالی وزیر ستان میں مسافر گاڑی کے قریب دھماکہ، 11 مزدور ہلاک

پاکستان کے صوبے خیبر پختونخوا کے ضلع شمالی وزیرستان تحصیل شوال میں مسافر گاڑی کے قریب ہونے والے دھماکے میں 11 افراد ہلاک ہوگئے۔

کے پی میں ضم قبائلی ضلع شمالی وزیرستان کے ڈپٹی کمشنر ریحان خٹک نے دھماکے کی تصدیق کرتے ہوئے بتایا کہ ’دھماکہ گل میر کوٹ کے قریب ایک مسافر گاڑی کے قریب ہوا جس میں سرکاری تعمیراتی کام سے مزدور گھر واپس جارہے تھے‘۔

ڈپٹی کشمنر نے کہا کہ’ دھماکے میں 11 مزدور ہلاک اور دو زخمی ہوئے ہیں۔ گاڑی میں سوار تین مسافر تاحال لاپتہ ہیں‘۔

ڈی سی شمالی وزیر ستان کے مطابق’ گاڑی میں 16 افراد سوار تھے۔ واقعہ کے فوری بعد امادای ٹیموں نے موقع پر پہنچ کر نعشوں اور زخمیوں کو ہسپتال منتقل کیا ہے‘۔

وزیرستان میں پولیس حکام نے ابتدائی رپورٹ کے حوالے سے بتایا ’دھماکہ سڑک کے کنارے نصب بم پھٹنے سے ہوا ہے تاہم مزید تحقیقات جاری ہیں‘۔

علاقے میں پولیس اور سیکیورٹی فورسز  مشترکہ سرچ آپریشن کررہی ہیں۔

نگراں وزیر داخلہ سرفراز بگٹی نے ٹویٹ کیا ’شمالی وزیر ستان میں ہونے والا تباہ کن دھماکہ ہولناک ہے‘۔

معصوم جانوں کا ضیاع حقیقتا دل دہلانے والا ہے۔غمزدہ خاندانوں کے ساتھ میری دلی تعزیت ہے۔

’ہم امن اور سیکیورٹی کو برقرار رکھنے کے عہد کے ساتھ دہشت گردی کے خلاف جنگ میں پرعزم ہیں۔ انصاف ہوگا اور ذمہ داروں کا احتساب ہوگا‘۔