فلم ’جوان‘ کا سحر، انڈیا بھر میں جشن کا سماں

بالی وُڈ کے بادشاہ شاہ رخ خان کی نئی فلم ’جوان‘ نے اپنی ریلیز سے پہلے ہی انڈیا سمیت دنیا بھر میں اپنی کامیابی منوا لی تھی۔

شاہ رخ خان کی فلم جوان آج جمعرات کو ریلیز ہوئی ہے جس کے بعد انڈیا بھر میں ایک تہوار سا سماں ہے۔

جوان کے ریلیز ہونے کے بعد سنیما گھروں میں تِل دھرنے کی جگہ نہیں مل رہی اور شاہ رخ خان کے مداح اور فلم بِین جوان کی ٹکٹیں حاصل کرنے کے لیے بے چینی کا شکار ہیں۔

جوان کی ریلیز سے قبل ہی انڈیا بھر میں پہلے دن کے لیے 13 لاکھ کے قریب ایڈوانس ٹکٹ فروخت ہوگئے تھے جس کے بعد یہ فلم اپنی ریلیز کے پہلے روز کھڑکی توڑ بزنس دینے کو تیار ہے۔

انڈیا بھر میں جوان کے جنون کا یہ عالم ہے کہ اس کی ریلیز کے پہلے دن مقامی وقت کے مطابق صبح پانچ بجے ہی سنیما گھروں میں پہلا شو چلایا گیا ہے جبکہ فلم نے دوپہر 12 بجے تک انڈیا کے دو بڑے سنیما گھروں ’پی وی آر‘ اور ’سنیپولیس’ سے 19 کروڑ انڈین روپے کما لیے ہیں۔
 

اگر جوان کی کہانی کی بات جائے تو یہ اچھائی اور برائی کے درمیان فرق کی کہانی ہے جس کے ذریعے معاشرے میں خواتین کے کردار کو مضبوط بنانے کی کوشش کی گئی ہے جبکہ اس فلم میں شاہ رخ خان کئی روپ دھارے ہوئے ہیں۔

جوان کی کاسٹ میں شاہ رخ خان، نائنتھارا، وجے سیتھوپاتھی، پریامانی، ثانیہ ملہوترا اور سنیل گروور شامل ہیں جبکہ دپیکا پاڈوکون اس فلم میں سپیشل کیمیو رول کر رہی ہیں۔

اس فلم کو جنوبی انڈیا کے ہدایتکار ایٹلی کمار نے بنایا ہے۔

دوسری جانب جوان فلم مداحوں کے ساتھ ساتھ تجزیہ کاروں اور ناقدین کو بھی پسند آئی ہے۔

معروف فلم ناقد اور باکس آفس ایکسپرٹ ترن آدرش نے فلم کو ’میگا بلاک بسٹر‘ قرار دے دیا ہے۔

ترن آدرش نے سماجی رابطوں کی ویب سائٹ ٹوئٹرپر لکھا کہ ’یہ ایک شاندار مصالحہ انٹرٹینر فلم ہے جو کہ شاہ رخ خان کی فلموں کی فہرست میں سب سے اوپر ہوگی۔ ایٹلی نے شاہ رخ خان کو بڑے کردار میں دکھایا ہے اور انہوں نے تباہی مچا دی ہے۔‘
 

صحافی ہمیش منکڈ کا کہنا ہے کہ ’شاہ رخ خان کی ایٹلی کے ساتھ فلم ایکشن، جذبات اور تفریح سے بھرپور ہے۔ اس میں بلاک بسٹر بننے کی تمام علامات ہیں۔‘
 

ٹوئٹر ہینڈل پن سٹار نے سنیما ہال کے اندر اور باہر کی ویڈیو شیئر کیں جس میں عوام جوان کے سحر میں مکمل طور پر مبتلا نظر آ رہے ہیں اور سنیما ہال کے اندر جشن کا سا سماں ہے۔

فلم کے آرٹ ڈائریکٹر نے انکشاف کیا تھا کہ ’جوان‘ کے ذریعے بالی وُڈ کے ’کنگ‘ کہلانے والے اداکار شاہ رخ نے 3000 خاندانوں کی مدد کی ہے۔