ورلڈ کپ: ’فخر زمان میں پروٹین کی کمی نہ جذبے کی‘

آئی سی سی کرکٹ ورلڈ کپ میں کھیلے جانے والے 35 ویں میچ میں پاکستان نے ڈک ورتھ لوئس میتھڈ کے تحت نیوزی لینڈ کو 21 رنز سے شکست دے دی ہے۔

بنگلورو میں کھیلے جانے والے میچ میں سنیچر کو نیوزی لینڈ کی جانب سے دیے گئے 402 رنز کے ہدف کے جواب میں پاکستانی اوپننگ بیٹر فخر زمان کیوی بولرز پر قہر بن کر ٹوٹ پڑے۔

فخر زمان نے 63 گیندوں پر سینچری سکور کی اور میچ کے اختتام پر 81 گیندوں پر 126 رنز بناکر ناقابل شکست رہے۔

فخر زمان نے اپنی اننگز میں 11 چھکے اور چھ چوکے لگائے۔

یہ کسی بھی پاکستانی بیٹر کی ون ڈے ورلڈ کپ میں تیز ترین سینچری ہے۔ اس سے قبل گرین شرٹس کی جانب سے عمران نذیر نے 2007 کے آئی سی سی ورلڈ کپ میں زمبابوے کے خلاف 95 گیندوں پر سینچری سکور کی تھی۔

صرف یہ ہی نہیں، فخر زمان نے ورلڈ کپ کی ایک اننگز میں پاکستان کی جانب سے سب سے زیادہ چھکے لگانے کا ریکارڈ بھی بنا ڈالا ہے جبکہ اُنہوں نے رواں برس نیوزی لینڈ کے خلاف اپنی چوتھی سینچری بھی مکمل کر لی ہے۔

When you score Pakistan's fastest men's ODI World Cup century

Fakhar Zaman has put on a clinic in Bengaluru #CWC23 #PAKvNZ pic.twitter.com/rSZ2TQXP1O

فخر زمان کے بارے میں سماجی رابطوں کی ویب سائٹ ایکس (ٹوئٹر) پر صارفین کے تبصرے بھی دیکھنے کو مل رہے ہیں۔

انڈیا کے سابق بیٹر وریندر سہواگ نے اپنی ٹویٹ میں لکھا کہ ’فخر زمان نے کیا اننگز کھیلی ہے۔ پاکستان کے بہترین بیٹر۔ خدا جانتا ہے کہ کون سے سیانے لوگوں نے اسے ٹورنامنٹ کے اہم حصے میں ٹیم سے باہر بٹھائے رکھا۔ نہ فخر میں پروٹین کی کمی ہے اور نہ جذبے کی۔‘
 

جونز نے اپنی ٹویٹ میں لکھا کہ ’یہ ورلڈ کپ کی تاریخ کے عظیم ترین اننگز میں سے ایک اننگز ہے۔‘
 

سابق پاکستانی کرکٹر محمد یوسف اپنی ٹویٹ میں لکھتے ہیں کہ ’فخر کی جانب سے شاندار بیٹنگ۔ اسی طرح کھیلتے رہیں۔ آپ کو یہ میچ جیتنا ہے اور ہمارا سر فخر سے بلند کرنا ہے۔ آخری بال تک لڑتے رہیں۔‘
 

محمد سروش ابراہیم نے فخر زمان کی شاندار اننگز پر تبصرہ کرتے ہوئے لکھا کہ ’آج بڑے موقع پر جو فخر زمان نے کیا ہے وہ کوئی بھی اور نہیں کر سکتا اور یہ کوئی پہلی مرتبہ نہیں ہے کہ فخر نے کچھ ایسا کیا ہو۔ یہ باقاعدہ بڑے میچ کے کھلاڑی ہیں۔‘
 

سید حسان اپنی ٹویٹ میں لکھتے ہیں کہ ’فخر زمان شاندار ہیں۔ کیا شاندار اننگز کھیلی ہے۔ پوری قوم کو آپ پر فخر ہے۔‘

 
سابق ویسٹ انڈین بولر اور کرکٹ کمنٹیٹر این بشپ نے اپنی ٹویٹ میں لکھا کہ ’فخر زمان کی جانب سے شاندار اننگز، ان کے پاس جو کُھل کر کھیلنے کی آزادی اور باقاعدہ جارحانہ مزاج ہے، وہ شاندار ہے۔ 2023 میں نیوزی لینڈ کے خلاف تیسری سینچری۔‘
 

فخر زمان ورلڈ کپ کے ایک میچ میں دس سے زائد چھکے مارنے والے دنیا کے چوتھے بیٹر بھی بن گئے ہیں۔ اس سے قبل انگلینڈ کے سابق کپتان ایئن مورگن 2019 کے ورلڈ کپ میں افغانستان کے خلاف ایک اننگز میں 17 چھکے لگا چکے ہیں۔

اسی طرح ویسٹ انڈیز کے سابق بیٹر کرس گیل نے 2015 کے ورلڈ کپ میں زمبابوے کے خلاف 16 چھکے مارے تھے جبکہ نیوزی لینڈ کے مارٹن گپٹل بھی 2015 کے ورلڈ کپ میں ویسٹ انڈیز کے خلاف ایک اننگز میں 11 چھکے لگا چکے ہیں۔