مملکت کے مختلف علاقوں میں اتوار تک بارش کی توقع

سعودی عرب میں موسمیات کے قومی مرکز نے کہا ہے کہ مملکت کے مختلف علاقوں میں اتوار تک ہلکی، درمیانے درجے اور تیزبارش کا امکان ہے۔

 سبق ویب سائٹ کے مطابق موسمیات کے قومی مرکز نے اس حوالے سے مزید کہا ہے کہ ریاض  میں آج سے اتوار تک درمیانے درجے کی بارشوں کا امکان ہے جبکہ عسیر، جازان، باحہ  بھی اتوار تک درمیانے سے لے کر شدید بارشوں کی زد میں رہیں گے۔

جبکہ نجران اور اس سے محلق مقامات میں ہلکی بارش کی توقع ہے۔

قومی مرکز کا کہنا ہے کہ اتوار تک مکہ ریجن کے مختلف علاقے جن میں  طائف، العرضیات، میسان، اضم اور الکامل  شامل ہیں میں درمیانی سے لے کر موسلا دھار بارشوں کا امکان ہے۔  جدہ، اللیث، القنفذہ، رابغ، خلیص، بحرہ، الجموم، تربہ، رنیہ اور المویہ میں ہلکی سے لے کر درمیانے درجے تک کی بارش کی توقع  ہے۔

موسمیات کے مرکز کا کہنا ہے کہ سنیچر اور اتوار کو مدینہ منورہ ریجن، طریف اورعرعر میں درمیانے سے لے کر تیز بارش کا امکان ہے اور رفحاء، قصیم ریجن، حفر الباطن، النعریہ، العلیا میں درمیانے  درجے اسی طرح حائل ریجن، دمام، الجبیل، بقیق، الاحساء، العدید اور الخفجی میں ہلکی سے لے کر درمیانے درجے کی بارش ہوسکتی ہے  جبکہ سنیچر کو الجوف ریجن میں بھی بارش کا امکان ہے۔

دوسری جانب شہری دفاع نے موسمیات کے قومی مرکز کی جانب سے مملکت کے مختلف علاقوں میں بارش کی پیشگوئی کے بعد لوگوں کو احتیاط برتنے اور محفوظ مقامات پر رہنے  کی ہدایات دی ہیں۔

شہری دفاع نے  ایکس اکاؤنٹ (ٹوئٹر) پر کہا ہے کہ موسمیات کے قومی مرکز کی  جانب سے کی گئی پیشگوئیوں کے حوالے سے احتیاط  تدابیر اختیار کی جائیں ۔

ایسی کسی جگہ پر نہ جائیں جہاں بارش کا پانی جمع ہوتا ہو اور وادیوں اور دلدلی مقامات پر جانے سے گریز کریں۔ باہر نکلنے سے قبل موسمیات کے حوالے سے خبریں اور حد درجے احتیاط کا مظاہرہ کیا جائے۔

شہری دفاع نے اتوار تک مملکت کے مختلف علاقے جو بارش سے متاثر ہوں گے وہاں کے شہریوں کو ایس ایم ایس کے ذریعے بھی مطلع کردیا ہے۔

شہری دفاع نے ایکس اکاؤنٹ پر  بارش سے متاثرہ علاقوں کے حوالے سے تفصیلی چارٹ بھی جاری کیا ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں