تجارتی پردہ پوشی پر شہری سمیت 4 غیر ملکیوں کو سزا، 60 لاکھ ریال اور 28 کلو گرام سونا ضبط

وزارت تجارت نے سعودی شہری کے نام پر غیر ملکیوں کے کاروبار میں ملوث 5 افراد کی سزا سنانے کے بعد تشہیر کی ہے۔

سبق ویب سائٹ کے مطابق وزارت تجارت نے تجارتی پردہ پوشی پر ملوث افراد سے 60 لاکھ ریال کے علاوہ 28 کلو گرام سونا ضبط کیا ہے۔

وزارت تجارت نے کہا ہے کہ ’سعودی شہری خالد عیظہ المنہالی کو غیر ملکیوں کو اپنے نام پر کاروبار کرنے کی اجازت دینے پرتین سال قید کی سزا سنائی گئی ہے ‘۔

’علاوہ ازیں تین یمنی تارکین، عماد علی، بسام علی اور فیصل عسکر کو سعودی کے نام پر اپنا کاروبار چلانے کا الزام ثابت ہونے پر تین تین سال کی سزا سنائی گئی ہے‘۔

’جبکہ پانچویں تارک کو کاروبار کا حساب کتاب رکھنے پر دو سال کی سزا سنائی گئی ہے‘۔

وزارت تجارت نے کہا ہے کہ ’مذکورہ افراد نے مدینہ منورہ اور نجران میں سونے کی دکانیں کھول رکھی تھیں جو درحقیقت غیر ملکیوں کی تھیں مگر کاروبار سعودی شہری کے نام پر تھا‘۔

’علاوہ ازیں ملزمان پر ایک لاکھ ریال جرمانہ، تجارتی سربمہر، لائسنس معطل اور غیر ملکیو ں کو سزا مکمل کرنے کے بعد بیدخل کرنے کی بھی سزا ہوئی ہے‘۔

وزارت نے کہا ہے کہ ’تفتیشی ٹیم کو یقینی طور پر شواہد اور دلائل ملے ہیں جن سے ثابت ہوتا ہے کہ مذکورہ کاربار تجارتی پردہ پوشی کے ضمن میں آتا ہے اور جن کی بنیاد پر عدالت میں کیس کیا گیا ‘۔