’گیری کرسٹن دور کا آغاز‘، نئے ہیڈ کوچ نے پاکستان کرکٹ ٹیم کو جوائن کر لیا

پاکستان کرکٹ ٹیم کے وائٹ بال ہیڈ کوچ گیری کرسٹن نے باضابطہ طور پر ٹیم کو جوائن کر لیا ہے۔

اتوار کو برطانیہ کے شہر لیڈز میں پاکستان کرکٹ ٹیم کے کپتان بابر اعظم نے جنوبی افریقہ کے سابق بلے باز اور نئے ہیڈ کوچ گیری کرسٹن کو ٹیم میں شامل ہونے پر خوش آمدید کہا۔

قومی ٹیم کے سینیئر مینیجر وہاب ریاض نے گیری کرسٹن کو ٹیم کی ٹریننگ شرٹ پیش کی۔

پاکستان کرکٹ بورڈ (پی سی بی) نے وائٹ بال کے لیے ہیڈ کوچ گیری کرسٹن اور ریڈ بال کے لیے سابق آسٹریلوی بولر جیسن گلیپسی اور پاکستان کے سابق بولر اظہر محمود کے ساتھ دو سال کا معاہدہ کیا ہے۔

واضح رہے کہ پاکستان اور انگلینڈ کے درمیان چار ٹی20 میچز پر مشتمل سیریز 22 سے 30 مئی کے درمیان کھیلی جائے گی۔ دونوں ٹیموں کے درمیان پہلا ٹی20 میچ بدھ کو ہیڈنگلے لیڈز میں کھیلا جائے گا۔

سپورٹس جرنلسٹ سہیل عمران نے گیری کرسٹن کی بابر اعظم، اظہر محمود اور وہاب ریاض کے ساتھ تصویر شیئر کرتے ہوئے لکھا کہ ’پاکستان کرکٹ ٹیم کے گیری کرسٹن دور کا آغاز ہو گیا ہے۔ گیری کرسٹن کے لیے نیک خواہشات ہیں۔ مجھے امید ہے کہ گیری کرسٹن اپنی سوچ اور سٹائل کے مطابق چلے اور فوری طور پر یہاں کے سسٹم کے گھیرے میں نہ آئے تو ضرور کامیاب ہوں گے۔‘

عرفان شاکر نے اس پوسٹ پر تبصرہ کرتے ہوئے امید ظاہر کی کہ ’بابر اعظم اور گیری کرسٹن کے درمیان اچھی بونڈنگ نظر آ رہی ہے۔‘