Sorry, you need to enable JavaScript to visit this website.

انگلینڈ کے کپتان جوز بٹلر پاکستان کے خلاف تیسرا ٹی20 نہیں کھیل پائیں گے

چار میچز کی اس سیریز میں انگلینڈ کو ایک صفر سے برتری حاصل ہے(فائل فوٹو: اے ایف پی)
انگلینڈ کرکٹ ٹیم کے کپتان جوز بٹلر پاکستان کے خلاف تیسرا ٹی20 میچ نہیں کھیل سکیں گے۔
خبر رساں ادارے اے ایف پی کے مطابق جوز بٹلر نے بدھ کو شیڈول ٹی20 انٹرنیشنل میچ سے قبل سکواڈ کو چھوڑ دیا ہے تاکہ وہ اپنی اہلیہ کے ساتھ رہیں، جو اپنے تیسرے بچے کو جنم دینے والی ہیں۔
انگلینڈ کے 33 سالہ کپتان جوز بٹلر نے ہفتے کو برمنگھم میں شاندار اننگز کھیلتے ہوئے 84 رنز بنائے تھے۔
بارش سے متاثر ہونے والی چار میچز کی اس سیریز میں انگلینڈ کو ایک صفر سے برتری حاصل ہے۔
جوز بٹلر کارڈف سٹیڈیم میں بدھ کو ہونے والے تیسرے ٹی20 میں شامل نہیں ہوں گے جبکہ نائب کپتان معین علی ان کی جگہ انگلینڈ کی قیادت کرنے کے لیے تیار ہیں۔
جمعرات کو لندن کے اوول سٹیڈیم میں اختتام پذیر ہونے والی یہ سیریز ویسٹ انڈیز اور امریکہ میں ہونے والے ٹی20 ورلڈ کپ کے وارم اپ میچز کے طور پر دیکھی جا رہی ہے، جس میں موجودہ چیمپئن انگلینڈ چار جون کو بارباڈوس میں سکاٹ لینڈ کے خلاف ٹائٹل کے دفاع کا آغاز کرے گا۔
انگلینڈ کے فاسٹ بولر جوفرا آرچر کو اوول فائنل سے قبل کارڈف سٹیڈیم میں ہونے والے میچ میں آرام دیا جا سکتا ہے۔
سنہ 2019 میں انگلینڈ کو ون ڈے ورلڈ کپ جتوانے میں نمایاں کردار ادا کرنے والے جوفرا آرچر کہنی کی انجری کا شکار ہیں۔ انہوں نے پاکستان کے خلاف ایجسٹن میں دو وکٹیں لے کر بین الاقوامی کرکٹ میں اپنی واپسی کو ممکن بنایا۔

شیئر: