ایشین کپ فائنل 2026 میں روایتی حریف انڈیا کے 212 رنز کے ہدف کے تعاقب میں پاکستانی ٹیم چھ وکٹوں کے نقصان پر 192 رنز بنا سکی اور 19 رنز سے شکست کھا گئی جس میں حسن نواز کے 51 گیندوں پر شاندار 96 رنز بھی شامل تھے۔
سنیچر کو جاپان کے شہر نشین میں ایشیئن گیمز کے فائنل میچ میں انڈیا نے ٹاس جیت کر پہلے بیٹنگ کی اور پاکستان کو جیتنے کے لیے مقررہ 20 اوورز میں 212 رنز کا بڑا ہدف دیا۔
ہدف کے تعاقب میں پاکستانی کپتان صاحب زادہ فرحان 11 گیندوں پر صرف 10 رنز بنا کر آؤٹ ہو گئے۔
اگلی وکٹ عثمان خان کی گری جو چھ گیندوں پر تین رنز بنا سکے۔ اس وقت پاکستان کی 36 رنز پر دو وکٹیں گر چکی تھیں۔ پاکستان پاور پلے میں دو وکٹوں کے نقصان پر 39 رنز ہی بنا سکا۔
مزید پڑھیں
معاذ صداقت نے قدرے ذمہ دارانہ کھیل پیش کیا لیکن وہ بھی زیادہ دیر وکٹ پر نہیں ٹھہر سکے اور 18 گیندوں پر 23 رنز بنا کر آؤٹ ہو گئے۔ اُس وقت ایسا لگ رہا تھا کہ پاکستان یکطرفہ طور پر ایک بار پھر انڈیا سے فائنل میں پہنچ کر ہار جائے گا لیکن اُس وقت حسن نواز اور صائم ایوب نے ذمہ دارانہ کھیل پیش کیا اور 87 رنز کی شاندار پارٹنر شپ قائم کرنے میں کامیاب رہے۔
لیکن صائم ایوب 22 گیندوں پر 29 رنز بنا کر شیوم دوبے کی گیند پر کیچ آؤٹ ہو گئے اور یوں پاکستان کے گولڈ میڈل جیتنے کی امید ختم ہو گئی۔ اُن کے بعد آئوٹ ہونے والے کھلاڑی عبدالصمد تھے جو نو گیندوں پر نو رنز ہی بنا سکے اور واشنگٹن سندر کی گیند پر کیچ آئوٹ ہو گئے۔
حسن نواز نے میدان کے چاروں طرف دلکش سٹروک کھیلے اور 51 گیندوں پر 188.24 کے رن ریٹ سے شاندار 96 رنز بنانے میں کامیاب رہے اور آخری گیند پر آؤٹ ہو گئے اور صرف چار رنز کی کمی سے سنچری مکمل نہ کر سکے۔ سعد مسعود 12 رنز بنا کر ناٹ آؤٹ رہے۔
انڈیا کی جانب سے اکشر پٹیل اور واشنگٹن سندر نے دو، دو اور شیوم دوب نے ایک وکٹ حاصل کی۔
اس سے قبل انڈیا نے پہلے بیٹنگ کرتے ہوئے مقررہ 20 اوورز میں 211 رنز بجائے تھے۔
ابھیشک شرما نے شاندار بلے بازی کی اور 28 گیندیں کھیل کر 61 رنز بنائے جن میں چھ چھکے بھی شامل تھے۔ سنجو سیمسن کامیاب نہ ہو سکے اور صرف دو رنز بنا کر احمد دانیال کی گیند پر کیچ آؤٹ ہو گئے جس کے بعد انڈین بلے بازوں نے تیز رفتاری سے رنز بنانے کا سلسلہ جاری رکھا۔
مڈل آرڈر بیٹنگ میں شریاس آئر 21 اور اِشان کشن 20 رنز بنا سکے۔ شیوم دوبے نے ایک بار پھر شاندار اننگز کھیلی اور صرف 15 گیندوں پر 27 رنز بنانے میں کامیاب رہے۔ تلک ورما صرف 22 گیندوں پر 51 رنز بنا کر ناٹ آؤٹ رہے اور کھیل کا پانسہ بدلنے میں کامیاب رہے اور یوں انڈیا مقررہ 20 اوورز میں چھ وکٹوں کے نقصان پر 211 رنز بنانے میں کامیاب رہا اور یوں پاکستان کو 212 رنز کا بڑا ہدف دیا۔
انڈیا نے پاور پلے میں دو وکٹوں کے نقصان پر 81 رنز بنائے اور پاکستانی گیند باز بے بس نظر آئے جس کے بعد مڈل اوورز میں پاکستان بولرز نے بہتر کھیل پیش کیا اور انڈین بلے باز تین وکٹوں کے نقصان پر 61 رنز ہی بنا سکے جب کہ فائنل اوورز میں انڈین بلے بازوں نے ایک وکٹ کے نقصان پر 69 رنز بنائے۔
پاکستانی بولر احمد دانیال اور عرفات منہاس نے دو دو جب کہ صائم ایوب اور ابرار احمد نے ایک ایک وکٹ حاصل کی۔ احمد دانیال سب سے مہنگے بولر ثابت ہوئے جنہیں تین اوورز میں 14.33 کی اکانومی سے 43 رنز پڑے جب کہ صائم ایوب نے چار اوورز میں 47 رنز کھائے۔
یوں انڈیا ایک بار پھر ایشین گیمز کرکٹ میں گولڈ میڈل حاصل کرنے میں کامیاب رہا جبکہ پاکستان سلور میڈل حاصل کر سکا۔
دونوں ٹیموں نے جمعرات کو سیمی فائنلز میں اپنے اپنے حریفوں کو بہ آسانی شکست دی اور فائنل میں پہنچے۔
انڈیا نے سری لنکا کو 124 رنز سے ہرایا جبکہ پاکستان نے بنگلہ دیش کو چھ وکٹوں سے شکست دی تھی۔
جاپان کے شہر نِشِن میں پیر کو بارش ہونے کی وجہ سے ایشیائی کھیلوں میں مردوں کے دونوں کوارٹر فائنلز منسوخ کر دیے گئے، جس کے بعد انڈیا اور پاکستان کے فائنل میں آمنے سامنے آنے کے امکانات بڑھ گئے تھے۔
خیال رہے کہ سال 2022 میں کھیلی گئی ایشین گیمز میں انڈیا نے افغانستان کو شکست دے کر گولڈ میڈل حاصل کیا تھا۔
