فلائی ناس کی مدینہ منورہ سے بحرین اور دوحہ کے لیے پروازیں

سعودی فضائی کمپنی ’فلائی ناس‘ جو مشرق وسطی اور دنیا بھر کی لو بجٹ ایئرلائنز میں سے ایک ہے، نے اپنے چوتھے آپریشن سینٹر مدینہ منورہ سے بحرین اور دوحہ کے لیے براہ راست پروازوں کا آغاز کردیا ہے۔

عاجل نیوز کے مطابق فلائی ناس نے 10 ستمبر سے مدینہ منورہ کے امیر محمد بن عبدالعزیز انٹرنیشنل ایئرپورٹ سے بحرین کے منامہ انٹرنیشنل ایئرپورٹ کے لیے ہفتے میں 3 براہ راست پروازوں کا سلسلہ شروع کیا ہے اور آج جمعرات 12 ستمبر سے مدینہ ایئرپورٹ سے دوحہ کے لیے ہفتے میں 2 براہ راست پروازوں کا آغاز کیا ہے۔

اس موقع پر بحرین اور دوحہ کے لیے  پہلی پرواز کے حوالے سے افتتاحی تقریب مدینہ ایئرپورٹ پر منعقد ہوئی جس میں مدینہ ایئرپورٹ کے انتظامات کو چلانے والی کمپنی طیبہ ایئرپورٹ آپریٹنگ کمپنی ، فلائی ناس کے علاوہ دیگر اعلی عہدیداروں اور مسافروں نے شرکت کی۔ دونوں پروازوں کے مسافروں کو فلائی ناس اور ایئرپورٹ آپریٹنگ کمپنی کی جانب سے یادگاری تحائف اور بہترین استقبال کیا گیا۔

فلائی ناس نے اپنے سفر کا آغاز 2007 سے شروع کیا تھا اور اب تک وہ 80 ملین سے زیادہ مسافروں  کو اپنے طیاروں کے ذریعے سفر کی سہولت فراہم کرچکا ہے۔

فلائی ناس 1500 سے زیادہ ہفتہ وار پروازوں کے ذریعے 70 سے زیادہ ڈومیسٹک اور انٹرنیشنل مقامات سے خود کو جوڑے ہوئے ہے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں