سعودی عرب میں مناسک حج کی ادائیگی کے لیے انتظامات کو آخری شکل دی جارہی ہے۔

مشاعر مقدسہ میں عازمین حج کو گرمی سے محفوظ رکھنے کےلیے میدان عرفات کو جانے والے راستوں پر بکثرت درخت لگائے گئے ہیں۔

سعودی ٹی وی الاخباریہ نے مشاعر مقدسہ ’منی، عرفات اور مزدلفہ‘ میں ترقیاتی کاموں کے حوالے سے پروگرام میں  بتایا کہ میدان عرفات جانے والے تمام راستوں پر جگہ جگہ شیڈز نصب کیے گئے ہیں۔ علاوہ ازیں وادی مزدلفہ اور دیگر مقامات پر روشنی کا مناسب انتظام کیا گیا ہے۔

میدان عرفات اور وادی منی کے مختلف مقامات پر ہر 500 میٹر بعد سروس سینٹرز قائم کیے گئے ہیں جہاں فرسٹ ایڈ اور دیگر سہولتیں فراہم ہوں گی۔

میدان عرفات سے مزدلفہ جانے کے لیے لچکدار راستوں کی تعمیر کی گئی ہے جسے گزشتہ برس تجرباتی طورپر بنایا گیا تھا تاہم اس سال اس کے دوسرے مرحلے کو مکمل کیا گیا ہے۔

ترقیاتی منصوبے کے تحت 15 ہزار مربع میٹر رقبے پر سبزہ لگایا گیا ہے جن میں پودے اور گھاس وغیرہ شامل ہے جس سے ماحول خوشگوار ہو سکے گا۔

مختلف مقامات پر 240 پھوار والے ٹاور ، 12 بڑی چھتریاں اور 14 تجارتی مراکز تعمیر کیے گئے ہیں۔