شام کے سرکاری ملازمین کو مالی معاونت فراہم کریں گے: سعودی وزیر خارجہ
دوطرفہ تعلقات کو مضبوط بنانے کے طریقوں پر تبادلہ خیال کیا گیا (فوٹو: ایس پی اے)
سعودی وزیر خارجہ شہزادہ فیصل بن فرحان نے کہا ہے کہ ’سعودی عرب، قطر کے ساتھ مل کر شام میں سرکاری ملازمین کو مالی امداد فراہم کرے گا۔‘
وہ دمشق میں شامی ہم منصب اسد الشیبانی کے ساتھ مشترکہ پریس کانفرنس سے خطاب کررہے تھے جنہوں نے دمشق پہنچنے پر وزیر خارجہ اور ان کے وفد کا استقبال کیا۔
سعودی عرب کے اعلی سطح کے اقتصادی وفد جس میں وزارت خزانہ اور سرمایہ کاری کے حکام شامل ہیں نے اپنے شامی ہم منصبوں کے ساتھ مشاورتی اجلاس کا انعقاد کیا۔
اس کا مقصد شام کی معیشت کی معاونت، سرکاری اداروں کی تعمیر و ترقی کو فروغ دینا اور برادر شامی عوام کی توقعات کی تکمیل میں تعاون کرنا ہے۔
اس سے قبل دونوں ملکوں نے مالیاتی شعبوں میں دوطرفہ تعلقات کو مضبوط بنانے کے طریقوں پر تبادلہ خیال کیا۔
سعودی پریس ایجنسی کے مطابق وزیر خارجہ کے ہمراہ اقتصادی وفد میں ایوان شاہی کے مشیر محمد بن مزید التویجری، نائب وزیر خزانہ عبدالمحسن بن سعد الخلف، معاون وزیر سرمایہ کاری ڈاکٹر عبداللہ بن علی الدبیخی، وزارت خارجہ کے اقتصادی و ترقیاتی امور کے انڈر سیکریٹری عبداللہ بن فہد بن زرعہ اور مختلف شعبوں کے اعلٰی عہدیدار شامل ہیں۔
