شاہ سلمان کی دعوت پر غزہ سے عازمین حج سعودی عرب پہنچ گئے

سعودی وزارت اسلامی امور کے حکام نے پیر کو خادم حرمین شریفین پروگرام کے تحت فریضہ حج کےلیے آنے والے فلسطینوں کے دوسرے گروپ کا خیرمقدم کیا ہے۔

ایس پی اے کے مطابق شاہ سلمان نے اس سال 100 سے زیادہ ملکوں کے دو ہزار 300 افراد کو حج کے لیے مدعو کیا ہے اس میں ایک ہزار کا تعلق فلسطین سے ہے۔

غزہ سے تعلق رکھنے والے 500 فلسطینی عازمین کے دوسرے گروپ میں شہدا، قیدیوں اور زخمیوں کے اہل خانہ شامل ہیں۔ گزشتہ روز مغربی کنارے سے عازمین کا پہلا گروپ مملکت پہنچا تھا۔

مملکت پہنچنے والے شاہی مہمانوں نے خادم حرمین شریفین پروگرام کے تحت فریضہ حج پر سعودی قیادت کا شکریہ ادا کیا ہے۔انہوں نے فراہم کی جانے والی خدمات کی تعریف کی۔

یاد رہے کہ ضیوف خادم حرمین شریفین برائے حج وعمرہ پروگرام کی نگرانی وزارت اسلامی امور کرتی ہے۔

وزارت نے مہمانوں کی جدہ ائیرپورٹ آمد او مکہ مکرمہ پہنچنے تک بہترین خدمات کی فراہمی کےلیے انتظامات کیے تھے۔

خادم حرمین شریفین پروگرام کا آغاز 1417 سال ہجری میں کیا گیا تھا۔ اس پروگرام کا مقصد اسلامی دنیا کے مذہبی، علمی اور دانشور رہنماوں کے ساتھ تعلقات کو مضبوط بنانا اور ثقافتی تبادلے کو فروغ دینا ہے۔

 اب تک 140 ممالک سے 65 ہزار کے قریب مرد وخواتین شاہی میزبانی میں فریضہ حج  ادا کرچکے ہیں۔