کراچی کی ملیر جیل سے متعدد قیدیوں کے فرار ہونے کی اطلاع موصول ہوئی ہے۔ ابتدائی اطلاعات کے مطابق متعدد قیدی جیل کی دیوار توڑ کر فرار ہوئے جبکہ فرار کے دوران قیدیوں اور پولیس اہلکاروں کے درمیان جھڑپیں بھی ہوئیں۔
ڈی آئی جی جیل خانہ جات حسن سہتو کے مطابق قیدیوں نے نہ صرف پولیس پر تشدد کیا بلکہ اہلکاروں سے اسلحہ بھی چھین لیا۔ واقعے کے بعد جیل کے اطراف وقفے وقفے سے فائرنگ کی آوازیں سنی گئیں۔
صورتحال کو قابو میں لانے کے لیے پولیس کے ساتھ ساتھ رینجرز کی بھاری نفری موقع پر پہنچ گئی ہے اور جیل کے اطراف سرچ آپریشن جاری ہے۔
سکیورٹی ذرائع کا کہنا ہے کچھ فرار ہونے والے قیدیوں کو دوبارہ گرفتار کر لیا گیا، تاہم حتمی تعداد اور تفصیلات تاحال سامنے نہیں آ سکیں۔
واقعے کے بعد علاقے میں خوف و ہراس پھیل گیا۔ شہریوں سے جیل کے اطراف جانے سے گریز کرنے کی اپیل کی گئی ہے۔
نجی ٹی وی چینلز نے پولیس حکام کے حوالے سے بتایا پچاس سے زیادہ قیدی فرار ہوئے ہیں، ملیر جیل کی ایک دیوار کو توڑا گیا، سرچ آپریشن میں فرار ہونے والے دس قیدیوں کو گرفتار کرنے کا دعوی کیا گیا ہے۔
