یورپی ممالک نے ایران پر زور دیا ہے کہ وہ اپنے جوہری پروگرام کے تنازع کے حل کے لیے امریکہ کے ساتھ سفارت کاری جاری رکھے۔
فرانسیسی خبر رساں ادارے اے ایف پی کے مطابق جمعے کو جنیوا میں ایرانی وزیر خارجہ عباس عراقچی سے ملاقات کے بعد جرمن وزیر خارجہ یوہان وڈیفول نے اپنے برطانوی، فرانسیسی اور یورپی یونین کے ہم منصبوں کے ہمراہ ایک بیان میں کہا کہ ’آج کی ملاقات کا اچھا نتیجہ یہ ہے کہ ہم اس تاثر کے ساتھ کمرے سے نکلے ہیں کہ ایران تمام اہم سوالات پر مزید بات چیت کے لیے تیار ہے۔‘
انہوں نے کہا کہ ’یہ بات بہت اہمیت کی حامل ہے کہ امریکہ ان مذاکرات اور حل میں حصہ لے۔‘
ایرانی وزیر خارجہ سے بات چیت کے بعد چاروں وزرائے خارجہ نے اپنی قومی زبانوں میں بیان کو پڑھا اور مزید پیش رفت کی امید کو ظاہر کیا۔ تاہم انہوں نے اس بات چیت میں کسی اہم پیش رفت کا ذکر نہیں کیا۔
خیال رہے کہ یہ ملاقات ایک ایسے وقت میں ہوئی ہے جب اسرائیل اور ایران کی جنگ دوسرے ہفتے میں داخل ہو چکی ہے، اور دونوں ایک دوسرے پر حملے کر رہے ہیں۔
برطانیہ کے وزیر خارجہ ڈیوڈ لیمی کا کہنا تھا کہ ’ہم ایران کے ساتھ بات چیت اور مذاکرات کو جاری رکھنے کے خواہش مند ہیں، اور ہم ایران پر زور دیتے ہیں کہ وہ امریکہ کے ساتھ بات چیت جاری رکھے۔‘
انہوں نے کہا کہ ’یہ ایک خطرناک لمحہ ہے، اور یہ بہت اہم ہے کہ ہم اس تنازع کو خطے (مشرق وسطیٰ) میں پھیلتے نہ دیکھیں۔‘
