’بہترین حج انتظامات‘ ، سعودی سفیر نواف المالکی اور وفاقی وزیر مذہبی امور کے اعزاز میں تقریب

پاکستان کے وفاقی وزیر مذہبی امور سردار محمد یوسف نے کہا ہے کہ ’اس سال حج آپریشن کی کامیابی اللہ کے فضل، حکومت پاکستان اور سعودی حکومت کی بہترین ہم آہنگی اور تعاون کا نتیجہ ہے۔‘

منگل کو اسلام آباد میں مرکزی جمعیت اہل حدیث اور پاک سعودی یکجہتی کونسل کے زیرِاہتمام ’بہترین حج انتظامات‘ کے موضوع پر خصوصی حج کانفرنس میں مقررین نے کہا کہ وفاقی وزیر مذہبی امور سردار محمد یوسف نے پاکستانی حجاج کے لیے جو قابلِ قدر خدمات اور کوششیں انجام دیں، وہ لائقِ تحسین ہیں۔

مرکزی جمعیت اہل حدیث کی جانب سے جاری کردہ بیان کے مطابق حج کانفرنس کے مہمانِ خصوصی وفاقی وزیر مذہبی امور سردار محمد یوسف تھے جبکہ مہمانِ اعزاز سعودی عرب کے سفیر نواف بن سعید المالکی تھے۔

کانفرنس کی صدارت امیر مرکزی جمعیت اہل حدیث سینیٹر ڈاکٹر حافظ عبد الکریم نے کی۔

حج کانفرنس سے سیکریٹری جنرل جمعیت علماء اسلام مولانا عبدالغفور حیدری، صدر پاک سعودی یکجہتی کونسل مولانا علی محمد ابو تراب، امیر جمعیت علماء اسلام (س) مولانا عبدالحق ثانی، مولانا محمد احمد لدھیانوی، سیکرٹری جنرل جمعیت اہل حدیث مولانا عبدالرشید حجازی، مولانا سبطین شاہ نقوی، مفتی فیروز الدین ہزاروی اور مولانا شفیق الرحمن علوی نے بھی خطاب کیا۔

پاکستان کے وفاقی وزیر مذہبی امور سردار محمد یوسف نے اپنے خطاب میں کہا کہ ’پاکستانی حجاج کی خدمت ہمارا دینی، قومی اور اخلاقی فریضہ ہے۔ اس سال حج آپریشن کی کامیابی اللہ کے فضل، حکومت پاکستان اور سعودی حکومت کی بہترین ہم آہنگی اور تعاون کا نتیجہ ہے۔ ہم آئندہ بھی مزید بہتری کے لیے پرعزم ہیں۔‘

اس موقعے پر سعودی سفیر نواف بن سعید المالکی نے اپنے خطاب میں کہا کہ ’سعودی عرب کی قیادت اور عوام پاکستانی بھائیوں سے دلی محبت رکھتی ہے۔ حجاجِ کرام کی خدمت سعودی حکومت کے لیے اعزاز ہے۔ آئندہ بھی سعودی عرب اپنے مہمانوں کی خدمت کے معیار کو مزید بلند کرے گا۔‘

سینیٹر ڈاکٹر حافظ عبد الکریم نے کہا کہ ’وفاقی وزیر مذہبی امور کی سربراہی میں پاکستانی حجاج کے لیے اعلیٰ درجے کے انتظامات کیے گئے جن پر پوری قوم ان کی شکر گزار ہے۔ سعودی حکومت نے بھی ہمیشہ حجاجِ کرام کی خدمت میں کوئی کسر نہیں چھوڑی۔‘