سعودی وفد کا پاکستان حج مشن کا دورہ، مثالی انتظامات کی ستائش

سعودی وزارتِ حج و عمرہ کے اعلیٰ سطحی وفد نے پاکستان حج مشن مکہ مکرمہ کا دورہ کیا اور حج 2025 کی شاندار تکمیل پر پاکستانی مشن کو مبارکباد پیش کی۔

وفد نے پاکستانی حجاج کے لیے کیے گئے مثالی انتظامات اور خدمات کو سراہتے ہوئے انہیں قابلِ تقلید قرار دیا۔

پیر کو وزارت مذہبی امور کی جانب سے جاری پریس ریلیز میں بتایا گیا ہے کہ سعودی وفد میں نائب وزیر برائے حج و عمرہ ڈاکٹر عبدالفتاح بن سلیمان مشاط، اسسٹنٹ نائب وزیر برائے حج آپریشن ایاد بن احمد رہبینی اور ڈائریکٹر جنرل حج امور ڈاکٹر بدر محمد السالمی شامل تھے۔

وفد کا استقبال ڈائریکٹر جنرل حج جدہ پاکستان، عبدالوہاب سومرو، سینئر جوائنٹ سیکریٹری وزارتِ مذہبی امور میرزا علی محسود، چیف فنانس و اکاؤنٹس آفیسر ذوالفقار خان اور ڈائریکٹر حج مکہ عزیزاللہ خان نے کیا۔

ملاقات کے دوران دونوں ممالک کے عہدیداران نے اس بات پر زور دیا کہ حج 2026 کے لیے بھی اُسی جذبۂ خدمت، باہمی ہم آہنگی اور ٹیم ورک کے ساتھ کام جاری رکھا جائے گا تاکہ عازمینِ حج کو ہر ممکن سہولیات فراہم کی جا سکیں۔

نائب وزیر ڈاکٹر مشاط نے پاکستان حج مشن کی پیشہ ورانہ صلاحیتوں، مخلصانہ کاوشوں اور منظم حج انتظامات کی کھل کر تعریف کی اور عبد الوہاب سومرو کو لبیتم ایوارڈ حاصل کرنے پر مبارکباد بھی پیش کی اور کہا کہ پاکستانی حجاج کی خدمت کے لیے جو اقدامات کیے گئے وہ لائقِ تحسین ہیں۔

اس موقع پر ڈائریکٹر جنرل پاکستان حج مشن جناب عبدالوہاب سومرو نے معزز مہمانوں کو خوش آمدید کہتے ہوئے ان کی آمد کو باعثِ اعزاز قرار دیا۔

انہوں نے کہا کہ سعودی وزارتِ حج و عمرہ کی رہنمائی اور مسلسل تعاون ہمارے لیے نہایت اہمیت کا حامل ہے اور پاکستان اس شراکت داری کو ہمیشہ قدر کی نگاہ سے دیکھتا ہے۔

ملاقات کے اختتام پر ڈی جی حج  عبدالوہاب سومرو نے سعودی وفد کو یادگاری شیلڈ پیش کی جس کا مقصد نہ صرف ان کی آمد کا خیرمقدم کرنا تھا بلکہ مستقبل میں باہمی روابط کو مزید مضبوط بنانے کے عزم کا اظہار بھی تھا۔