الباحہ کرافٹسمین فورم جو بچوں اور نوجوانوں کو روایتی دستکاری سکھا رہا ہے

الباحہ اپنی روایتی دستکاری کے لیے بھی مشہور ہے۔ بچوں اور نوجوانوں کو اس ہنر کی بنیادی گُر سکھانے کے لیے’الباحہ کرافٹسمین فورم‘ نے ایک پروگرام منعقد کیا جس کا انتظام ’ٹیکنیکل اینڈ ووکیشنل ٹریننگ کارپوریشن‘ کی طرف سے کیا گیا ہے۔

فورم کے سپروائزر نوف الحربی نے بتایا کہ فورم میں دس سپیشلائزڈ تربیتی کورسز رکھے گئے ہیں جن میں کروشیے سے گڑیاں بنانے، کھجور کے تنے اور پتوں سے بُنائی اور پتھروں اور ماربل میں کندہ کاری کے کورس بھی شامل ہیں۔

سعودی پریس ایجنسی کے مطابق یہ کورسز ماہر انسٹرکٹرز کی نگرانی میں کرائے جاتے ہیں جو ہنر اور روایتی مہارتوں اور جدید ڈیزائن کو ملا کر یکجا کر دیتے ہیں اور ایسا توازن پیدا کرتے ہیں جو ثقافتی ورثے کا تحفظ کرتا ہے اور آج کی مارکیٹ کی ڈیمانڈ بھی پوری کرتا ہے۔

الباحہ سمر فیسٹول کے دوسرے ہفتے میں فورم کا آغاز سنیچر کو ہوا جس میں بہت سے لوگوں نے شرکت کی۔

ایک ماہ تک جاری رہنے والا یہ فورم جو حکومتی اور نجی شعبے کے ساتھ شراکت میں کیا جا رہا ہے، مختلف تربیتی کورسز، مکالمے کے سیشن اور لائیو انٹرایکٹیو سرگرمیاں پیش کرتا ہے جن کا مقصد ثقافتی ورثے کو دھوم دھام سے منانا ہے۔

فورم کا مقصد ریجن کے روایتی ہنر اور ثقافتی ورثے کو یکجا کرنا اور دستکاروں اور عوام کے درمیان روابط کو فروغ دینا ہے۔

اس سے قبل سعودی پریس ایجنسی نے بتایا تھا کہ سپیشل ٹرینرز کی نگرانی میں یہ تربیتی پروگرام، شام چار بجے ہوتے ہیں اور رات آٹھ بجے تک جاری رہتے ہیں۔

ان پروگراموں میں جن کورسسز پر توجہ دی جا رہی ہے ان میں کھجور کے تنے اور پتوں کے ساتھ چیزیں بنانے میں مہارت حاصل کرنا، السدُو کی بُنائی سیکھنا، کروشیے سےگُڑیاں بنانا اور پتھر اور ماربل میں کندہ کاری کرنا شامل ہیں۔

اس پروگرام کی نمایاں اور قابلِ دلچسی چیز السدُو کی بُنائی کا کارنر ہے جسے اس کی گہری ثقافتی اہمیت اور فنکارانہ نزاکت کے پیشِ نظر بہت قدر کی نگاہ سے دیکھا جا رہا ہے۔

السدُو بُنائی کی ایک قدیم تیکنیک ہے جسے صحراؤں میں رہنے والی خواتین کمیونیٹیوں نے شروع کیا تھا اور اس میں اُون کو رنگ برنگے دھاگوں کے ساتھ ملا کر استعمال میں لایا جاتا ہے اور ماحول سے متاثر ہو کرے نمونے بنائے جاتے ہیں۔

یہ بُنائی جیومیٹری کی شرائط کے عین مطابق ہونے کی وجہ سے مشہور ہے اور اس کی اپنی ایک مخصوص جمالیاتی حیثیت ہے۔ اس آرٹ سے خواتین دستکاروں کے ہنر اور تخلیق کا خوبصورت اظہار ہوتا ہے۔