فرانس، فلسطینی ریاست کو تسلیم کرے گا، صدر ایمانویل میکخواں
جمعرات 24 جولائی 2025 23:52
ستمبر میں اقوام متحدہ کی جنرل اسبملی میں اس کا باضابطہ اعلان کروں گا (فائل: فوٹو اے ایف پی)
صدر ایمانویل میکخواں نے اعلان کیا ہے کہ ’فرانس ستمبر میں اقوام متحدہ کی جنرل اسمبلی میں فلسطینی ریاست کو تسلیم کرے گا۔‘
فرانسیسی صدر نے کہا’ مشرق وسطی میں منصفانہ اور دیرپا امن کے لیے اپنے تاریخی عزم کے مطابق میں نے فیصلہ کیا ہے کہ فرانس، فلسطینی ریاست کو تسلیم کرےگا۔‘
ایکس اکاونٹ اور انسٹا گرام پر پوسٹ میں لکھا’ میں ستمبر میں اقوام متحدہ کی جنرل اسبملی میں اس کا باضابطہ اعلان کروں گا۔‘
اب تک 142 ممالک فلسطینی ریاست کو تسلیم کرچکے ہیں تاہم اسرائیل اور امریکہ اس کی شدید مخالفت کرتے ہیں۔
فرانس، فلسطینی ریاست کو تسلیم کرنے والی یورپ کی سب سے اہم طاقت ہوگی۔
انہوں نے لکھا ’آج کی فوری ترجیح غزہ میں جنگ کا خاتمہ اور شہری آبادی کو بچانا ہے۔‘
فلسطینی اتھارٹی کے نائب صدرحسین الشیخ نے فلسطینی ریاست کو تسلیم کیے جانے کے اعلان کا خیرمقدم کرنے ہوئے فرانسیسی صدر کا شکریہ ادا کیا ہے۔
عاجل نیوز کے مطابق فرانسیسی صدر نے فلسطینی صدر کے لیے پیغام میں کہا ’اسرائیل اور فلسطین ایک دوسرے کے ساتھ امن و امان سے رہیں، یہی واحد سیاسی حل ہے جو دونوں کی جائز امنگوں کو پورا کرنے کا واحد راستہ ہوگا اور اب اسے جلد از جل حاصل کرنا چاہئے۔‘
’ عوام نے7 اکتوبر کے حملوں کی بھاری قیمت ادا کی ہے جو حماس نے کیے اور اسرائیل نے غزہ میں جنگ جاری کی جس کے ساتھ مشرق وسطی میں تنازعات کے بڑھتے گئے تاہم میں ہار نہیں مانوں گا۔‘
فرانسیسی صدر کا کہنا تھا ’اس وقت فوری ضرورت ہے کہ واحد قابل عمل حل کو عملی طورپر نافذ کیا جائے جو فلسطینی عوام کی جائز خواہشات کو پورا کرتے ہوئے جنگ اور ہرقسم کے تشدد کو روکے تاکہ اسرائیل اور خطے کے تمام ممالک امن وسلامتی کے ساتھ رہیں۔‘
انہوں نے واضح کیا کہ’ فرانس اور سعودی عرب کی سربراہی میں اقوام متحدہ میں ہونے والی کانفرنس کا مقصد بھی یہی ہے کہ فلسطین کے مسئلے کو حل کرنے کے لیے دوریاستی فارمولے کو نافذ کیا جائے۔‘
