پاکستانی اور امریکی وزرائے خارجہ کی پہلی ملاقات، ’امن کےلیے پاکستان نے ہمیشہ مثبت کردار ادا کیا‘

پاکستان کے نائب وزیراعظم و وزیر خارجہ اسحاق ڈار نے امریکی وزیر خارجہ مارکو روبیو سے واشنگٹن ڈی سی میں ملاقات کی ہے۔

پاکستان کے دفتر خارجہ کی جانب سے جاری ہونے والے بیان کے مطابق جمعے کو امریکی محکمہ خارجہ پہنچنے پر امریکی حکام کی جانب سے نائب وزیراعظم و وزیر خارجہ پاکستان اسحاق ڈار کا استقبال کیا گیا۔

امریکہ میں پاکستان کے سفیر رضوان سعید شیخ بھی اسحاق ڈار کے ہمراہ تھے۔

وفود کی سطح پر ہونے والی ملاقات میں دونوں فریقین کی جانب سے سینیئر حکام شریک ہوئے۔

پاکستان اور امریکہ کے وزرائے خارجہ کے درمیان یہ پہلی بالمشافہ ملاقات ہے۔ اس سے قبل دونوں رہنماؤں کے درمیان ٹیلی فونک روابط قائم تھے۔

ملاقات میں پاکستان اور امریکہ کے تعلقات اور مختلف شعبہ جات میں ممکنہ تعاون پر تفصیلی بات چیت کی گئی۔

دوطرفہ تجارتی و اقتصادی روابط کے فروغ، سرمایہ کاری، زراعت، ٹیکنالوجی، معدنیات سمیت اہم شعبہ جات میں تعاون پر تبادلہ خیال کیا گیا۔ اس کے علاوہ انسدادِ دہشت گردی اور علاقائی امن کے حوالے سے بھی بات چیت کی گئی۔

نائب وزیراعظم و وزیر خارجہ اسحاق ڈار نے عالمی امن کے فروغ کے حوالے سے صدر ٹرمپ اور امریکی قیادت کی کوششوں کو خراجِ تحسین پیش کیا۔

انہوں نے کہا کہ پاکستان اور انڈیا کی حالیہ کشیدگی کے حوالے سے صدر ٹرمپ کا کردار اور کاوشیں لائق تحسین ہیں۔

بیان کے مطابق امریکی وزیرِ خارجہ مارکو روبیو کی جانب سے دہشت گردی کے خلاف جنگ میں پاکستان کی لازوال قربانیوں کا اعتراف کیا گیا۔

امریکی وزیر خارجہ نے کہا کہ ’عالمی و علاقائی امن کے حوالے سے پاکستان نے ہمیشہ مثبت کردار ادا کیا ہے۔‘

نائب وزیراعظم و وزیر خارجہ اسحاق ڈار کا کہنا تھا کہ دوطرفہ تعلقات میں مزید وسعت اور استحکام کے خواہاں ہیں۔ دونوں ملکوں کے درمیان جاری ٹریڈ ڈائیلاگ میں مثبت پیش رفت کے حوالے سے پُرامید ہیں۔ پاکستان امریکی کاروباری برادری اور سرمایہ کاروں کے لیے پرکشش منزل ہے۔

انہوں نے کہا کہ علاقائی امن کے حوالے سے دونوں ممالک کے نقطہ نظر اورمفادات میں ہم آہنگی ہے۔ امریکہ میں موجود پاکستانی کمیونٹی دونوں ممالک کے درمیان ایک پل کا کردار ادا کر رہی ہے۔

دونوں رہنماؤں نے دوطرفہ تعلقات کے فروغ اورمختلف شعبہ جات میں مضبوط اور منظم روابط استوار کرنے کے ضمن میں مل کر کام کرنے کے عزم کا اعادہ کیا۔