ژوب میں کلیئرنس آپریشن، مزید 14 دہشت گرد ہلاک: آئی ایس پی آر

بلوچستان کے ضلع ژوب کے علاقے سمبازہ میں دو روزہ آپریشن کے دوران ہلاک ہونے والے دہشت گردوں کی تعداد 47 ہوگئی ہے۔

پاکستان کی فوج کے شعبہ تعلقات عامہ (آئی ایس پی آر) کی جانب سے سنیچر کو جاری کردہ بیان کے مطابق 7 اور 8 اگست کی درمیانی شب سکیورٹی فورسز نے ژوب کے علاقے سمبازہ میں کامیاب آپریشن کرتے ہوئے 33 دہشت گردوں کو ہلاک کیا۔  

بیان کے مطابق آٹھ اور نو اپریل کی درمیانی شب پاکستان افغانستان سرحد کے قریب سمبازہ کے قریبی علاقوں میں آپریشن کیا گیا۔

آپریشن کے دوران  مزید 14 ’انڈین سپانسرڈ‘ دہشت گردوں کو ہلاک کیا گیا۔ ہلاک ہونے والے دہشت گردوں کے قبضے سے اسلحہ، گولہ بارود اور دھماکہ خیز مواد بھی برآمد ہوا ہے۔

آئی ایس پی آر کے مطابق دو روزہ آپریشن میں ہلاک ہونے والے دہشت گردوں کی  تعداد 47 ہوگئی ہے۔

آئی ایس پی آر کا کہنا ہے کہ ’سکیورٹی فورسز ملک کی سرحدوں کو محفوظ بنانے اور پاکستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پُرعزم ہیں۔‘

گذشتہ روز جمعے کو آئی ایس پی آر نے کہا تھا کہ ’سات اور آٹھ اگست کی درمیانی رات کو انڈیا کے حمایت یافتہ فتنہ الخوارج کے ایک بڑے گروہ نے افغانستان کی سرحد سے دراندازی کی کوشش کی جو بلوچستان کے ضلع ژوب کے علاقے میں سکیورٹی فورسز کی نظروں میں آ گئے۔‘

’سکیورٹی فورسز کے اہلکاروں نے مؤثر طریقے سے دراندازی کی کوشش کو ناکام بنا دیا۔‘ 

بیان میں مزید کہا گیا کہ ’ایک اور مربوط آپریشن کے نتیجے میں انڈیا کے حمایت یافتہ 33 خوارجی ہلاک ہوئے۔ ہلاک ہونے والوں سے بھاری تعداد میں اسلحہ، ایمونیشن اور دھماکہ خیز مواد بھی برآمد ہوا ہے۔‘