منشیات کی سمگلنگ پر غیرملکی کو سزائے موت

سعودی وزارت داخلہ نے جمعرات کو مکہ ریجن میں منشیات کی سمگلنگ کے الزام میں ایک غیرملکی کی سزائے موت پر عمل درآمد کرادیا۔

اخبار 24 کے مطابق وزارت داخلہ نے کہا کہ ایک افغان شہری محمد کریم اسحق نے مملکت میں منشیات سمگل کرنے کی کوشش کی جس پر سیکیورٹی  حکام نے اسے پکڑ لیا اور تمام شواہد کے ساتھ عدالت میں پیش کردیا۔

وزارت داخلہ کے مطابق عدالت میں افغانی نے اپنے جرم کا اقرار کرلیا جس پر اسے موت کی سزا کا حکم سنا دیا گیا۔

ابتدائی عدالتی فیصلے کو اعلی عدالت نے بھی بحال رکھا۔ بعدازاں ایوان شاہی سے سزائے موت کے احکامات کی توثیق ہونے پر  جمعرات کو مکہ مکرمہ ریجن میں وزارت داخلہ نے سزائے موت پر عمل درآمد کرا دیا۔

سعودی وزارت داخلہ کا کہنا ہے کہ سعودی حکومت اپنے شہریوں اور مقیم غیرملکیوں کو نشے کی ہلاکت خیزی سے بچانے کے لیے مستعد ہے اور اس حوالے سے منشیات کی سمگلنگ میں جو بھی ملوث ہوگا اسے قانون کے مطابق سزا دی جائے گی۔