عمان میں کوہ پیمائی کے دوران معروف سعودی شاعر گر کر ہلاک

معروف سعودی شاعر سعود بن معدی القحطانی کو سلطنت عمان کے صوبہ ظفار میں کوہ پیمائی کے دوران حادثہ پیش آیا جہاں وہ جبل سمحان کی ڈھلوان سے پھسل کر ہلاک ہوگئے ہیں۔

العربیہ کے مطابق جبل سمحان ظفار کی نمایاں ترین پہاڑی بلندیوں میں سے ہے جو اپنی دشوار گزار زمین اور سخت ڈھلوانوں کی وجہ سے مہم جو اور کوہ پیمائی کے شوقین افراد کو اپنی طرف کھینچتا ہے۔

سعودی شاعر سعود بن معدی القحطانی کو پہاڑ سے گرنے کے باعث شدید چوٹیں آئیں جن کے بعد انہیں اسپتال منتقل کیا گیا مگر وہ جانبر نہ ہوسکے۔

دریں اثنا مسقط میں سعودی سفارت خانے نے کہا ہے کہ ’شاعر القحطانی کے جبل سمحان سے گرنے کے حادثے کی کارروائی شروع کر دی گئی ہے‘۔

’سلطنت عمان میں متعلقہ حکام کے ساتھ رابطے میں ہیں تاکہ متوفی کا جسد خاکی وطن منتقل کیا جا سکے‘۔

سعودی سفارت خانے نے متوفی کے اہل خانہ سے گہری تعزیت کا اظہار کیا ہے۔

واضح رہے کہ متوفی سعودی شاعر سعود بن معدی القحطانی عوامی شاعری کے میدان میں نمایاں مقام رکھتے تھے۔

 انہیں ’شاعر الجنوب‘ (جنوب کا شاعر) کہا جاتا تھا کیونکہ ان کی شاعری میں جنوبی ماحول اور اس کے جذبات کی عکاسی نمایاں تھی۔

اپنی ادبی زندگی میں انہوں نے کئی ایسے کلام پیش کئے جو وسیع پیمانے پر مقبول ہوئے، ان کی تخلیقات مختلف اخبارات میں شائع ہوئیں اور وہ ملک کے اندر اور باہر متعدد شعری نشستوں میں شریک رہے۔