سعودی کسٹم نے ایک ہفتے میں ایک ہزار 469 ممنوعہ اشیا ضبط کیں
تمباکو اور اس کی مصنوعات سمگل کرنے کی ایک ہزار 250 کوششوں کو ناکام بنایا۔(فوٹو: ایس پی اے)
سعودی زکوۃ، ٹیکس اینڈ کسٹمز اتھارٹی نے ایک ہفتے کے دوران بری، بحری اور فضائی پورٹس پر ایک ہزار469 ممنوعہ اشیا ضبط کی ہیں۔
ایس پی اے کے مطابق یہ اقدام معاشرے کو سمگلنگ اور غیر قانونی سرگرمیوں سے بچانے اور نیشنل سکیورٹی برقرار رکھنے کی مسلسل کوششوں کا حصہ ہے۔
بیان میں کہا گیا کہ ضبط کی جانے والی ممنوعہ اشیا میں 49 اقسام کی منشیات جس میں حشیش، کوکین، نشہ آور گولیاں شامل ہیں، دیگر ممنوعہ مواد کے 315 کیسز سامنے آئے۔
کسٹم حکام نے تمباکو اور اس کی مصنوعات سمگل کرنے کی ایک ہزار 250 کوششوں کو بھی ناکام بنایا۔ مالی رقوم کے علاوہ ہتھیار اوراس سے منسلک آلات کے کیسز بھی پکڑے ہیں۔
زکوۃ، ٹیکس اینڈ کسٹمز اتھارٹی نے ملکی درآمدات اور برآمدات پر کسٹم کنٹرول کو مضبوط بنانے، معاشرے کے تحفظ کو یقینی بنانے کے عزم کا اعادہ کیا۔
بیان میں سمگلنگ اور ہر قسم کی غیر قانونی تجارت کو روکنے کےلیے متعلقہ حکام سے تعاون پر بھی زور دیا گیا۔
