سعودی پروجیکٹ کے تحت یمن سے ایک ہفتے میں مزید 828 بارودی سرنگیں تلف

سعودی عرب کے مسام پروجیکٹ کے تحت گزشتہ ہفتے یمن کے مختلف علاقوں سے مزید 828 بارودی سرنگوں اور دھماکہ خیز ڈیوائسز کو ہٹایا گیا ہے۔

عرب نیوز کے مطابق ان میں 783 پھٹنے سے رہ جانے والا آرڈیننس، 4 ٹینک شکن اور 2 اینٹی پرسنل بارودی سرنگیں شامل  ہیں۔

مسام کے منیجنگ ڈائریکٹر اسامہ القصبی نے بتایا 2018 میں منصوبے کے آغاز کے بعد سے اب تک 5 لاکھ 11 ہزار 355 بارودی سرنگوں کو تلف کیا جا چکا ہے۔

دھماکہ خیز مواد اور بارودی سرنگوں کو بلا تفریق زمین میں بچھایا گیا تھا جو عام لوگوں، خاص طور پر بچوں، خواتین اور عمر رسیدہ افراد کے لیے سنگین خطرہ بن رہا تھا۔

مارب، عدن، الجوف، شبوہ، تعز، الحدیدہ، لحج، البیضا، الضالح اورصعدہ میں بارودی سرنگیں ہٹانے کےلیے کام کیا گیا۔

اس پروجیکٹ کے تحت باردوی سرنگیں صاف کرنے والے مقامی انجینیئروں کی تربیت کی جاتی ہے اور انھیں آلات فراہم کیے جاتے ہیں اور جو یمنی دھماکہ خیز مواد کی وجہ سے زخمی ہو جاتے ہیں، یہ پروجیکٹ انھیں مدد بھی دیتا ہے۔

پروجیکٹ کے تحت مختلف ٹیموں کو دیہات، سڑکوں اور سکولوں سے بارودی سرنگوں یا دھماکہ خیز مواد کو ہٹانے کا کام سونپا جاتا ہے تاکہ عام لوگ محفوظ رہتے ہوئے نقل و حرکت کر سکیں۔ انسانی بنیادوں کے تحت دی جانے والی امداد عام لوگوں تک پہنچ سکے۔

پروجیکٹ کی کوششوں سے ہلاکتوں میں نمایاں کمی ہوئی، بے گھر افراد اور کسانوں کو اپنے علاقوں میں واپس آنے اور کاشتکاری دوبارہ شروع کرنے کا موقع ملا ہے۔