دہشت گردی اور سیکیورٹی اہلکار کو قتل کرنے پر شہری کو سزائے موت

سعودی وزارت داخلہ نے کہا ہے کہ دہشت گردی اور سیکیورٹی اہلکار کو قتل کرنے پر سعودی شہری پر سزائے موت کا فیصلہ نافذ کر دیا گیا ہے۔

سعودی پریس ایجنسی کے مطابق وزارت داخلہ نے کہا ہے کہ ’سعودی شہری  فیصل بن عوض بن تایہ العنزی کو دہشت گردی اور متعدد جرائم کے الزام میں گرفتار کیا گیا تھا‘۔

’مذکورہ شخص نے بیرون ملک دہشت گرد تنظیم میں شمولیت اختیار کی، ایک سیکیورٹی اہلکاروں کو قتل کے ارادے سے نشانہ بنایا جبکہ دوسرے سیکیورٹی اہلکار کو قتل کیا اور معاشرے کے امن و استحکام کو نقصان پہنچانے کی کوشش کی ہے‘۔

وزارت نے کہا ہے کہ ’تمام ثبوت اور دلائل کے ساتھ انہیں عدالت میں پیش کیا گیا جہاں الزام ثابت ہونے اور زمین میں فساد پھیلانے پر سزائے موت کا فیصلہ سنا دیا گیا‘۔

’بعد ازاں اپیل کورٹ نے زریں عدالت کے فیصلے کی تصدیق کی اور ایوان شاہی نے فیصلے پر عملدرآمد کی منظوری دی ہے‘۔

وزارت نے کہا ہے کہ ’آج بدھ کوقصیم ریجن میں عدالت کا فیصلہ نافذ کردیا گیا ہے‘۔