جی سی سی اور برطانیہ کا وزارتی اجلاس، قیام امن کےلیے مشترکہ کوششوں پر زور

 جی سی سی ممالک اور برطانیہ نے قیام امن اور بحرانوں کے حل کے لیے مشترکہ کوششوں پر زور دیا ہے۔

نیویارک میں جی سی سی ممالک کے وزرائے خارجہ اور برطانوی وزیر خارجہ یویٹ کوپر کی ملاقات کے بعد مشترکہ بیان جاری کیا گیا ہے۔

سعودی خبررساں ایجنسی ’ایس پی اے‘ کے مطابق مشترکہ بیان میں جی سی سی ممالک کی جانب سے ثالثی کی کوششوں کو سراہا گیا۔

اجلاس کے شرکا نے 9 ستمبر کو دوحہ پر اسرائیلی حملے کی مذمت کرتے ہوئے اسے قطر کی خود مختاری کی کھلی خلاف ورزی قرار دیا۔

مسئلہ فلسطین کے حوالے سے غزہ میں فوری جنگ بندی اور دو ریاستی حل کی بھرپور تائید  پر زور دیتے ہوئے فلسطینی ریاست کو تسلیم کرنے کے اعلان کا خیرمقدم کیا گیا۔

وزارتی اجلاس میں  تنازع کے سیاسی حل کے حوالے سے سعودی عرب اورفرانس کے کردار کی بھی تعریف کی گئی۔ 

 فلسطینی اتھارٹی کو غزہ اور مغربی کنارے پر قیادت کرنے کے قابل بنانے پر زور دیا گیا۔

وزراتی اجلاس نے اس بات کی یقین دہانی کی کہ ایران کے پاس جوہری ہتھیار نہیں ہونا چاہئیں۔

سلطنت عمان کی جانب سے تہران اور واشنگٹن کے درمیان ثالثی کے عمل کو سراہا گیا۔

ایران پر حملے روکنے اور بین الاقوامی جوہری توانائی ایجنسی سے ایران کے مکمل تعاون پر زور دیا گیا۔