باز میلے کے موقع پر وزارت داخلہ کی خصوصی امیگریشن مہر

وزارتِ داخلہ نے سعودی فالکن کلب کے تعاون سے  انٹرنیشنل فالکن اینڈ ہنٹنگ فیسٹول کے موقع پر خصوصی امیگریشن سٹیمپ جاری کی ہے۔

سعودی خبررساں ادارے ’ایس پی اے‘ کے مطابق شمالی ریاض کے علاقے ’ملھم‘ میں سعودی فالکن کلب کے زیر اہتمام انٹرنیشنل باز اور شکار میلہ 2025 کا آغاز 2 اکتوبر کو کیا جا چکا ہے جو 11 اکتوبر تک جاری رہے گا۔

فالکن اینڈ ہنٹنگ فیسٹول 2025 میں 45 سے زائد ممالک سے تعلق رکھنے والے 13 سو سے زائد بازوں کے ماہرین اور اس شعبے کے معروف برانڈز شرکت کر رہے ہیں۔

وزارت داخلہ کی جانب سے اس ایونٹ پر جاری کی جانے والی خصوصی امیگریشن مہر ریاض کے شاہ خالد انٹرنیشنل ایئرپورٹ، دمام کے شاہ فہد انٹرنیشنل ایئرپورٹ، شاہ عبدالعزیز انٹرنیشنل ایئرپورٹ جدہ کے علاوہ مشرقی ریجن کی بری سرحدی چیک پوسٹوں پر آنے والے مسافروں کے پاسپورٹس پر لگائی جائے گی۔

فیسٹول کے حوالے سے جاری کی گئی خصوصی امیگریشن مہر کا استعمال میلے کے اختتام تک جاری رہے گا جس کے بعد معمول کے مطابق مہر استعمال کی جائے گی۔

واضح رہے مملکت میں یہ روایت ہے کہ مختلف اہم مواقع پر وزارت داخلہ کی جانب سے خصوصی امیگریشن مہر جاری کی جاتی ہے تاکہ یہاں ہونے والے اہم مواقع تاریخی اعتبار سے محفوظ ہو سکیں۔