ضلع اورکزئی میں آپریشن، فتنہ الخوارج کے تمام 30 شدت پسند ہلاک: آئی ایس پی آر

پاکستان کی فوج کے شعبہ تعلقات عامہ (آئی ایس پی آر) نے کہا ہے کہ ’سکیورٹی فورسز نے ضلع اورکزئی میں دہشت گردی میں ملوث عناصر کے خلاف کارروائیاں کرتے ہوئے انڈیا کے سپانسرڈ فتنہ الخوارج کے تمام 30 شدت پسندوں کو ہلاک کر دیا ہے۔‘

جمعے کو آئی ایس پی آر کی جانب سے جاری بیان کے مطابق ’سکیورٹی فورسز نے 7 اکتوبر کو ضلع اورکزئی میں پیش آنے والے ہولناک واقعے میں ملوث خوارج کے خلاف مسلسل کارروائیوں کا سلسلہ جاری رکھا ہوا ہے۔

’اس واقعے میں وطن کے بہادر سپوت، لیفٹیننٹ کرنل جنید طارق اور میجر طیب راحت سمیت 11 جوان شہید ہو گئے تھے۔‘

بیان میں کہا گیا ہے کہ سکیورٹی فورسز نے مصدقہ انٹیلی جنس اطلاعات کی بنیاد پر ضلع اورکزئی کے علاقے جمال مایہ میں کی جانے والی کارروائی کے دوران شدید فائرنگ کے تبادلے کے بعد انڈیا کے سپانسرڈ فتنہ الخوارج کے تمام 30 شدت پسندوں کو انجام تک پہنچا دیا۔

آئی ایس پی آر کے مطابق یہ کامیاب آپریشن نہ صرف اس سفاکانہ واقعے کا بدلہ ہے بلکہ اس کے اصل منصوبہ سازوں کو کیفرِ کردار تک پہنچا دیا گیا ہے۔

’علاقے میں کلیئرنس اور سینیٹائزیشن آپریشنز جاری ہیں تاکہ کسی بھی انڈین سپانسرڈ فتنہ دہشت گرد کو تلاش کر کے ختم کیا جا سکے۔‘

آئی ایس پی آر کے مطابق ’پاکستان کی سکیورٹی فورسز ملک سے انڈین سپانسرڈ دہشت گردی کے مکمل خاتمے کے لیے پُرعزم اور ثابت قدم ہیں۔‘

افغانستان کی سرحد کے قریب اس علاقے میں یہ حالیہ عرصے میں پاکستان کی فوج کی ایک بڑی کارروائی ہے جس میں اتنی اموات ہوئی ہیں۔

ماضی میں پاکستان کے ایسے حملوں کے بعد افغانستان سے تعلقات کشیدگی کا شکار ہو چکے ہیں اور دونوں اطراف سے معاملات کو بہتر کرنے کی ضرورت پر زور دیا جاتا رہا ہے۔