سعودی ہیریٹج کمیشن نے ڈیڑھ ہزار نئے مقامات کا اندراج کرلیا

سعودی ہیریٹج کمیشن نے نیشنل اربن ہیرٹیج رجسٹر میں ایک ہزار 500 نئے مقامات کا اندراج کیا ہے، نئے اضافے کے بعد تاریخی مقامات کی کل تعداد 11 ہزار 500 ہوگئی ہے۔

ایس پی اے کے مطابق نئے رجسٹرڈ مقامات میں سے ریاض میں ایک ہزار 100 سائٹس شامل ہیں جن میں کنگ عبدالعزیز رائل ریزرو کے ساتھ ابتدائی سروے منصوبے کے نتائج ہیں۔

الباحہ ریجن میں 184، تبوک میں 85، حدود الشمالیہ میں 70 جبکہ جدہ میں 3 سائٹس کا اندراج کیا گیا۔

ہیریٹج کمیشن کا یہ اقدام سعودی ورثے اور آثار قدیمہ کے مقامات کو دستاویزی شکل دینے اور تحفظ کی کوششوں کا حصہ ہے۔

یہ رجسٹریشن نوادرات، عجائب گھروں اور شہری ورثے کے قانون کے نفاذ کے بعد کی گئی۔ کمیشن کے بورڈ آف ڈائریکٹرز نے ایک فیصلے کے ذریعے ادارے کے سی ای او کو ورثے اور آثار قدیمہ کے مقامات کو رجسٹر کرنے اور ان کے تحفظ کا اختیار دیا ہے۔

کمیشن نے شہریوں اور رہائشیوں سے پھر کہا کہ’ وہ بلاغ پلیٹ فارم، آفیشل سوشل میڈیا اکاونٹس یا مقامی برانچوں کے ذریعے غیر رجسٹرڈ ہیریٹج سے متعلق اطلاع دیں۔‘