غزہ جنگ بندی معاہدہ، تمام 20 اسرائیلی یرغمالی ریڈ کراس کے حوالے

اسرائیل کی فوج نے کہا ہے کہ حماس نے باقی 13 اسرائیلی یرغمالی ریڈ کراس کے حوالے کر دیے ہیں جنہیں اسرائیل پہنچایا جائے جائے گا۔

اس سے قبل حماس نے پیر کو پہلے سات یرغمالیوں کو ریڈ کراس کے حوالے کیا تھا۔

اسرائیلی فوج نے تصدیق کی ہے کہ حماس نے 13 مغویوں کے دوسرے گروپ کو غزہ میں ریڈ کراس کے حوالے کر دیا ہے، جس کے ساتھ ہی تمام 20 زندہ قیدیوں کی رہائی مکمل ہو گئی ہے۔

فوج نے ایک بیان میں کہا کہ ’ریڈ کراس کی جانب سے فراہم کردہ معلومات کے مطابق 13 مغویوں کو ان کے حوالے کر دیا گیا ہے اور وہ غزہ کی پٹی میں آئی ڈی ایف (فوج) اور آئی ایس اے (سکیورٹی ایجنسی) کی فورسز کی جانب روانہ ہیں۔‘

بین الاقوامی خبر رساں اداروں کے مطابق یرغمالیوں کی حالت کے بارے میں فوری طور پر کوئی معلومات دستیاب نہیں ہوئیں۔

حماس کا کہنا ہے کہ 20 یرغمالیوں کے بدلے اسرائیل میں قید 1900 سے زیادہ فلسطینی قیدیوں کو رہا کیا جائے گا۔

اس اعلان پر یرغمالیوں کے اہل خانہ اور دوستوں نے خوشی سے نعرے لگائے جب اسرائیلی ٹی وی چینلز نے اعلان کیا کہ یرغمالی ریڈ کراس کے حوالے کر دیے گئے ہیں۔

بین الاقوامی ریڈ کراس کمیٹی نے پیر کو کہا تھا کہ اس نے ’کئی مراحل پر مشتمل آپریشن‘ شروع کر دیا ہے تاکہ اسرائیل حماس جنگ بندی کے تحت یرغمالیوں اور قیدیوں کی رہائی کی نگرانی کی جا سکے۔

ریڈ کراس نے کہا کہ وہ غزہ کی پٹی میں رکھے گئے یرغمالیوں کو وصول کرے گا تاکہ انہیں اسرائیلی حکام کے حوالے کیا جا سکے، جبکہ قیدیوں کی رہائی کی نگرانی بھی کرے گا تاکہ انہیں غزہ کی پٹی اور مغربی کنارے منتقل کیا جا سکے۔

ریڈ کراس نے مزید کہا کہ ’یہ ادارہ ان افراد کی باقیات کی منتقلی میں بھی سہولت فراہم کرے گا تاکہ ان کے اہل خانہ اپنے پیاروں کو عزت کے ساتھ دفن کر سکیں۔‘

اسرائیلی فوج نے پہلے بتایا تھا کہ ریڈ کراس کا ایک قافلہ اسرائیلی یرغمالیوں کے پہلے گروپ کو لینے کے لیے روانہ ہو چکا ہے، جنہیں حماس کی جانب سے غزہ میں جنگ بندی کے معاہدے کے تحت رہا کیا جانا ہے۔

فوجی بیان میں کہا گیا کہ حوالگی ’شمالی غزہ کی پٹی میں ایک مقام پر ہو گی جہاں کئی یرغمالیوں کو منتقل کیا جائے گا۔‘

بیان میں مزید کہا گیا کہ ’آئی ڈی ایف (اسرائیلی افواج) مزید یرغمالیوں کو وصول کرنے کے لیے تیار ہے، جنہیں بعد میں ریڈ کراس کے حوالے کیے جانے کی توقع ہے۔