پاکستان میں ’گو اے آئی ہب‘ کے مصنوعی ذہانت مرکز کا افتتاح

سعودی عرب اور پاکستان کے درمیان بڑھتے ہوئے تعاون کے تناظر میں، گو ٹیلی کمیونی کیشنز گروپ نے اسلام آباد میں تقریب کا انعقاد کیا ہے جس کا عنوان ’مستقبل کی توانائی: گو ٹیلی کمیونی کیشنز سعودی عرب اور پاکستان کے درمیان جدت کا پُل‘ تھا۔

سبق ویب سائٹ کے مطابق تقریب کے دوران گو اے آئی ہب کے نام سے مصنوعی ذہانت کا مرکز اور ٹیلنٹ سینٹر کے قیام کا اعلان کیا گیا ہے۔

تقریب میں دونوں ممالک کے متعدد اعلیٰ عہدیداروں نے شرکت کی ہے جن میں سعودی عرب کے سفیر نواف بن سعید المالکی اور وفاقی وزیر برائے اطلاعات و ٹیکنالوجی محترمہ شزا فاطمہ خواجہ سمیت دونوں ممالک کے مواصلاتی و تکنیکی شعبوں کے رہنما شامل تھے۔

یہ اقدام دونوں ممالک کی قیادت کے مشترکہ وژن کی عکاسی کرتا ہے، جو ڈیجیٹل معیشت کو مضبوط بنانے، انسانی صلاحیتوں کی ترقی اور جدید ٹیکنالوجیز کو پائیدار اقتصادی ترقی کے محرک کے طور پر فروغ دینے کے لیے پرعزم ہے۔

یہ منصوبہ گو ٹیلی کمیونی کیشنز گروپ کے اس عزم کی بھی توثیق کرتا ہے جو سعودی عرب کی اعلیٰ قیادت کے اس وژن کے مطابق ہے جس کا مقصد قومی معیشت کی تنوع پذیری، سعودی عرب کو علاقائی اختراع اور ڈیجیٹل تبدیلی کے مرکز کے طور پر مضبوط کرنا اور پاکستان کے ساتھ علمی و تکنیکی تعاون کے پل استوار کرنا ہے۔

تقریب کا اختتام سعودی اور پاکستانی اداروں کے درمیان متعدد مفاہمتی یادداشتوں کے دستخط کے ساتھ ہوا جن کا مقصد اختراع، مصنوعی ذہانت اور تکنیکی ترقی کے میدانوں میں تعاون کو فروغ دینا ہے۔

یہ اقدام دونوں ممالک کے درمیان ڈیجیٹل شراکت داری کے نئے دور کا آغاز ہے جو مستقبل کی ٹیکنالوجیز اور ڈیجیٹل انٹرپرینیورشپ میں مزید مشترکہ اقدامات کی راہ ہموار کرے گا۔