وزارتِ داخلہ کے تعاون سے ملائیشیا میں 25 کلو کوکین سمگلنگ کی کوشش ناکام
وزارتِ داخلہ کے تعاون سے ملائیشیا میں 25 کلو کوکین سمگلنگ کی کوشش ناکام
جمعہ 24 اکتوبر 2025 23:38
کوکین کو طبی آلات میں چھپا کر اسمگل کیا جارہا تھا(فوٹو، ایس پی اے)
وزارتِ داخلہ کے ترجمان بریگیڈیئرطلال بن عبدالمحسن الشلھوب کا کہنا ہے کہ وزارت کی جانب سے مجرمانہ نیٹ ورکس کے خاتمے کے لیے کی جانے والی پیشگی سیکیورٹی نگرانی کے نتیجے میں منشیات اسمگلنگ کی بڑی کوشش کو ناکام بنا دیا گیا ہے۔
سعودی خبررساں ایجنسی ’ایس پی اے‘ کے مطابق وزارتِ داخلہ کے ترجمان بریگیڈیئرشلھوب کا مزید کہنا تھا کہ وزارت کے ذیلی ادارے ڈائریکٹوریٹ آف نارکوٹکس کنٹرول کی جانب سے فراہم کردہ مصدقہ معلومات کی بنیاد پر ملائیشیا کے محکمہ کسٹمز اینڈ نارکوٹکس نے کامیاب کارروائی کرتے 25 کلو گرام کوکین کی اسمگلنگ کی کوشش کو ناکام بنا دیا۔
نشہ آور خطرناک پاوڈر’کوکین‘ طبی آلات کی کھیپ میں چھپایا گیا تھا جس کی قبل از وقت نشاندہی کرکے اسمگلنگ کی کوشش کو ناکام بنایا گیا۔
بریگیڈیئرالشلھوب نے اس موقع پر ملائیشیا کے متعلقہ اداروں کے ساتھ تعاون کو سراہتے ہوئے کہا کہ سعودی عرب منشیات کے عالمی نیٹ ورکس کے خلاف اپنی کوششیں جاری رکھے ہوئے ہے۔
انکا مزید کہنا تھا کہ مملکت کی جانب سے ان تمام مجرمانہ سرگرمیوں پر گہری نظر رکھی جاتی ہے جن مقصد سعودی عرب کے امن واستحکام اور نوجوانوں کے مستقبل کو منشیات لعنت سےتباہ کرنا ہے۔
چیک پوسٹ پرٹرک کے خفیہ خانوں سے 8 کلو نشہ آور پاوڈر برآمد کیا گیا(فوٹو، ایکس)
دوسری جانب سعودی محکمہ کسٹم و زکوۃ اتھارٹی کے ترجمان حمود الحربی کا کہنا تھا کہ کسٹم اہلکاروں نے بری سرحدی چیک پوسٹ پر آنے والے ایک ٹرالر کے خفیہ خانوں میں انتہائی مہارت سے چھپائی گئی نشہ آور گولیوں کی بڑی کھیپ برآمد کرلی۔
الحربی کا مزید کہنا تھا کہ منشیات کو وصول کرنے کے لیے آنے والے دو افراد کو بھی حراست میں لے لیا گیا ہے۔ ٹرک کے خفیہ خانوں سے برآمد ہونے والے نشہ آور پاوڈر کا مجموعی وزن 8.9 کلو گرام تھا جسے ٹرالر کے نیچے ویکیوم ٹینک میں انتہائی مہارت سے چھپایا گیا تھا مگر کسٹم اہلکاروں کی تجربہ کاری سے وہ پوشیدہ نہ رہ سکی۔
