اسلام آباد میں بارش اور ژالہ باری کے بعد موسم سرد، پنجاب میں بھی رِم جِھم کا امکان

وفاقی دارالحکومت اسلام آباد، راولپنڈی اور ملحقہ علاقوں میں تیز بارش اور ژالہ باری کے بعد موسم کافی سرد ہو گیا ہے جبکہ محکمہ موسمیات نے دیگر علاقوں میں بھی آج اور کل بارش کی پیش گوئی کی ہے۔

اسلام آباد میں صبح سے ہی مطلع ابرآلود تھا جبکہ محکمہ موسمیات نے بھی بادل برسنے کی پیش گوئی کر رکھی تھی، صبح 10 کے قریب مختلف سیکٹرز میں بارش کا سلسلہ شروع ہوا جبکہ راولپنڈی کے کچھ مقامات پر بھی بارش ہوئی۔

محکمہ موسمیات کی ویب سائٹ پر دیگر علاقوں میں بھی بارش کا امکان ظاہر کیا گیا ہے۔

رپورٹ کے مطابق آج بالائی خیبر پختونخوا، شمال مشرقی پنجاب، خطہ پوٹھوہار، گلگت بلتستان اور کشمیر میں گرج چمک کے ساتھ بارش ہو گی جبکہ مری، گلیات اور ملحقہ پہاڑی علاقوں میں ژالہ باری بھی متوقع ہے۔

دوسری جانب ترجمان پی ڈی ایم کی جانب سے بھی بتایا گیا ہے کہ آج پنجاب کے زیادہ تر اضلاع میں ہلکی بارش ہو سکتی ہے جس سے درجہ حرارت میں کمی آئے گی۔

ان کا کہنا تھا کہ راولپنڈی، لاہور، مری، گلیات، تلہ گنگ، اٹک، سرگودھا، جہلم، خوشاب، سیالکوٹ، گوجرانوالہ اور نارووال سمیت بعض دوسرے شہروں میں بھی بارش ہو سکتی ہے جبکہ مری اور گلیات سمیت دوسرے پہاڑی مقامات پر برف باری کا بھی امکان ہے۔

انہوں نے یہ بھی کہا کہ اس بارش سے پنجاب میں سموگ میں کمی آنے کے بھی امکانات ہیں تاہم شہری سموگ سے بچاؤ کے لیے ماسک کا استعمال کریں۔

اسی طرح ڈی جی پی ڈی ایم اے عرفان علی کاٹھیا کی جانب سے بتایا گیا ہے ہنگامی صورت حال میں ہیلپ لائن 1129 پر رابطہ کیا جا سکتا ہے۔

خیبر پختونخوا کے حوالے سے بتایا گیا ہے کہ دیر، چترال، سوار، مالم جبہ، کوہستان، کالام، ایبٹ آباد، بٹگرام، ہری پور، صوابی، مردان، نوشہرہ، چارسدہ، ہنگو، کرک اور ملحقہ علاقوں میں بھی بارش کا امکان ہے۔

سندھ اور بلوچستان کے بیشتر اضلاع میں موسم خشک اور سرد رہنے کی پیش گوئی کی گئی ہے۔

پاکستان کے زیادہ تر علاقوں میں مون سون کی تباہ کن بارشوں اور سیلاب کے بعد سے موسم خشک ہے جبکہ پنجاب کے دارالحکومت لاہور سمیت متعدد اضلاع سموگ کی لپیٹ میں ہیں، جس سے نمٹنے کی کوششی جاری ہیں اور ماہرین کا کہنا ہے کہ بارش ہونے کی صورت میں سموگ میں کمی آئے گی۔