امریکہ: ’میری بیوی کے سامان میں بم ہے‘، مسافر کی جھوٹی شکایت پر طیارے کی ہنگامی لینڈنگ

امریکہ میں اپنی نوعیت کا دلچسپ اور عجیب واقعہ اس وقت پیش آیا جب ’یونائیٹڈ ایئرلائنز‘ کی پرواز کو ایک مسافر کے سامان میں بم کی اطلاع پر ہنگامی لینڈنگ کرنا پڑی۔

نیو یارک پوسٹ کے مطابق فلائٹ میں سوار ایک مسافر نے عملے کو شکایت کی کہ ان کی بیوی کے سامان میں بم موجود ہے۔

مسافر کی اس حرکت کی وجہ سے طیارے میں خوف و ہراس پھیل گیا اور جہاز کو ہنگامی لینڈنگ کرنی پڑی۔

خبر کے مطابق یہ پرواز امریکی شہر ڈیلاس سے شکاگو جا رہی تھی تاہم مسافر کی اطلاع پر اتوار کی صبح اسے ریاست میسوری میں ہنگامی طور پر لینڈ کروایا گیا۔

رپورٹ کے مطابق طیارے کو صبح آٹھ بج کر 40 منٹ پر سینٹ لوئس لیمبرٹ انٹرنیشنل ایئرپورٹ پر ہنگامی طور پر اتارا گیا۔

قانون نافذ کرنے والے اداروں نے طیارے کی مکمل تلاشی لی تاہم کسی قسم کا کوئی بم یا دھماکہ خیز مواد برآمد نہیں ہوا۔

حکام کے مطابق تفتیش کے بعد یہ معلوم ہوا ہے کہ مسافر نے جھوٹی اطلاع دی تھی۔ مذکورہ مسافر کو حراست میں لے کر تحقیقات شروع کر دی گئیں ہیں اور اس پر مقدمہ قائم کیا جائے گا۔

ایئرپورٹ حکام نے بتایا ہے کہ واقعے میں کوئی شخص زخمی نہیں ہوا۔

یونائیٹڈ ایئرلائنز کے مطابق سیکیورٹی اداروں کے طیارے کو کلیئر قرار دینے کے بعد پرواز نے دوبارہ سینٹ لوئس سے اڑان بھری اور بعد ازاں شکاگو میں بحفاظت لینڈ کر گئی۔

ایئرلائن نے اپنے بیان میں کہا ہے کہ ’یونائیٹڈ ایئر لائنز کی پرواز 380 کو ممکنہ سکیورٹی خدشے کے باعث سینٹ لوئس میں لینڈ کرایا گیا۔ قانون نافذ کرنے والے اداروں نے طیارے کی تلاشی لے کر اسے کلیئر کیا، جس کے بعد پرواز نے دوبارہ اُڑان بھری اور بحفاظت شکاگو پہنچ گئی۔‘