چنئی میں انڈین فضائیہ کا طیارہ گر کر تباہ، پائلٹ محفوظ رہا

انڈین فضائیہ کا ایک طیارہ چنئی کے چنگل پٹو ضلع کے تمبرم میں میں گر کر تباہ ہو گیا۔

انڈین اخبار ہندوستان ٹائمز کے مطابق پیلاٹس پی سی-7 طیارہ معمول کی تربیتی پرواز پر تھا جب یہ حادثہ پیش آیا۔

پائلٹ نے بروقت طیارے سے نکل کر اپنی جان بچالی۔

خبر رساں ایجنسی پی ٹی آئی نے حادثہ کی جگہ کی ایک ویڈیو شیئر کی، جس میں تباہ شدہ طیارے کے ملبے کو زمین پر بکھرا ہوا دکھایا گیا ہے جبکہ مقامی لوگ جائے وقوعہ پر موجود نظر آرہے ہیں۔

بعد میں انڈین فضائیہ نے حادثے کی تصدیق کرتے ہوئے کہا کہ واقعے کی تحقیقات کا حکم دے دیا گیا ہے اور کسی جانی یا مالی نقصان کی اطلاع نہیں ملی۔

انڈین فضائیہ نے ایکس  پر جاری بیان میں کہا کہ ’انڈین فضائیہ کا پی سی-7 مارک ٹو  ٹرینر طیارہ آج تقریباً 14:25 بجے معمول کی تربیتی پرواز کے دوران تمبرم، چنئی کے قریب حادثے کا شکار ہوا۔ پائلٹ محفوظ طور پر باہر نکل آیا، اور کسی شہری املاک کو نقصان نہیں پہنچا۔ حادثے کی وجہ جاننے کے لیے ایک کورٹ آف اِنکوائری قائم کر دی گئی ہے۔‘