سعودی وزیر اطلاعات سلمان الدوسری نے کہا ہے کہ ’ولی عہد شہزادہ محمد بن سلمان کے دورۂ امریکہ کی دنیا بھر میں ریکارڈ میڈیا کوریج ہوئی ہے۔‘

الاخباریہ کے مطابق سلمان الدوسری نے اتوار کو ریاض میں پریس کانفرنس سے خطاب کرتے ہوئے کہا کہ ’سعودی ولی عہد کے دورہ امریکہ کے حوالے سے 48 گھنٹے سے بھی کم وقت میں شائع ہونے والا مواد ایک لاکھ 20 ہزار سے زیادہ رہا جبکہ چار ارب سے زیادہ مرتبہ دیکھا گیا۔‘

سعودی وزیر اطلاعات نے کہا کہ ’یہ اعداد وشمار بین الاقوامی سطح پر سعودی عرب کے کردار کے اہم اثرات کی عکاسی کرتے ہیں۔‘

معیشت کے حوالے سے بتایا کہ ’مملکت میں تجارتی سرگرمیوں میں بھی ریکارڈ اضافہ نوٹ کیا گیا۔ گزشتہ اکتوبر کے اختتام تک تجارتی رجسٹریشن کی 1.8 ملین رجسٹرڈ کی گئی جو کہ گزشتہ برس اسی عرصے کے مقابلے میں 18 فیصد زیادہ ہے۔‘

انہوں نے بتایا کہ ’مملکت میں سال 2024 کے دوران عسکری اخراجات کی لوکلائزیشن کی شرح کو بڑھا کر 25 فیصد کیا گیا۔ سال 2030  عسکری اخراجات کی لوکلائزیشن کا ہدف 50 فیصد تک ہے جس کا مقصد عسکری مصنوعات کی قومی سطح پر تیاری ہے۔‘

انہوں نے بتایا کہ ’مملکت نے ثقافتی سرمایہ کاری کانفرنس 2025 کا انعقاد کیا جس میں معاہدے پانچ ارب ریال سے تجاوز کر گئے تھے جس کا مقصد ثقافتی شعبے میں ترقی اور مقامی صنعت کا فروغ ہے۔‘

سلمان الدوسری کا کہنا تھا کہ ’ریاض میں 120 ممالک کی شرکت کے ساتھ ورلڈ ٹورازم فورم ’ٹورائز‘ کا کامیاب انعقاد کیا گیا جس میں عالمی سطح پر سیاحت کے مستقبل کے تحفظ کے لیے 113 ارب ڈالر کی سرمایہ کاری کی، اس شعبے میں مملکت کی پوزیشن عالمی سطح پر بھی مستحکم ہوئی۔

وزیر اطلاعات نے سپورٹس  کے حوالے سے مملکت کے بڑھتے ہوئے کردار کو اجاگر کیا اور کہا کہ ’ریاض میں 57 ممالک پر مشتمل چھٹے اسلامی یکجہتی گیمز کی میزبانی کی جس کا مقصد سپورٹس کی سرگرمیوں کو بڑھانا ہے۔‘