سعودی عرب کا 74 واں طیارہ غزہ کےلیے امداد لے کر مصر پہنچ گیا
اتوار 23 نومبر 2025 23:16
امدادی سامان میں فوڈ باسکٹس اور شیلٹر بیگ موجود ہیں (فوٹو: ایس پی اے)
سعودی عرب کا 74 واں طیارہ اتوار کو غزہ کےلیے امدادی سامان لے کر مصر کے العریشں ائیرپورٹ پہنچ گیا۔
ایس پی اے کے مطابق امدادی سامان میں فوڈ باسکٹس اور شیلٹر بیگ موجودہیں جنہں غزہ میں موجود فلسطینی متاثرین تک پہنچا یا جا ئے گا۔
شاہ سلمان مرکز، سعودی وزارت دفاع اور قاہرہ میں سعودی سفارتخانے کے تعاون سے امدادی سرگرمیاں جاری رکھے ہوئے ہے۔
یہ امداد غزہ میں فلسطینی عوام کو ریلیف فراہم کرنے کے لیے شروع کی جانے والی مہم کا حصہ ہے۔ موجودہ انسانی صورتحال کے اثرات کو کم کرنے، فلسطینیوں کے مصائب کو دور کرنے کے حوالے سے مملکت کے عزم کو ظاہر کرتی ہے۔
سعودی امدادی ایجنسی نے غزہ میں امداد کی فراہمی کےلیے فضائی اور بحری پل قائم کیے۔ اب تک 74 طیاروں اور 8 بحری جہازوں کے ذریعے ہزاروں ٹن سے زیادہ امداد کے علاوہ فلسطینی ہلال احمر سوسائٹی کو 20 ایمبولینسں فراہم کیں۔
شاہ سلمان مرکز نے غزہ کی پٹی میں امدادی منصوبوں پر عملدرآمد کے لیے بین الاقوامی تنظیموں کے ساتھ 90.35 ملین ڈالر کے معاہدوں پر دستخط بھی کیے ہیں۔
